Youri Latortue di lwa Sena a te ba l dwa pou li anplwaye manman l

Nan yon konferans pou laprès ki te tanmen ayè jedi 9 mas la, ansyen palmantè Youri Latortue tante defann tèt li nan dosye ki enplike li menm ak manman l nan detounman lajan leta. Nan eksplikasyon l bay yo li fè konprann lwa Sena a te pèmèt li anplwaye manman l, Carmène Immacula Cantave pou jere biwo l yo.

Kèk jou aprè Inite Lit Kont koripsyon(ULCC) sòti epi transfere douvan lajistis 9 dosye yo mennen ankèt sou yo pou pousuit nesesè yo, ansyen senatè Youri Latortue ki gen non l ak non manman l ki site nan rapò sa, te deside sòti nan silans li, pou defann li devan je sosyete a.

Konsa li fè konnen Kontrèman ak ULCC ki di nan rapò a Carmène Immacula Cantave te okipe yon pòs ki pa egziste, Youri di se lwa Sena a menm ki te bay pèmisyon pou tout senatè gen yon moun yo fè konfyans ki pou jere biwo l, epi li te soulinye sou anviwon 29 senatè gen pou piti 20 ladan yo moun yo te anplwaye yo, se moun ki gen lyen parante ak yo.

“Atik 26.e règleman lwa Sena a di depi yon senatè eli li gendwa ak frè mansyèl pou biwo l, sa k pòtoprens ak sa ki nan depatman l, se lwa Sena a ki di sa. E biwo Sena a avèk konferans prezidan yo ki fèt yo di se pou senatè yo bay yon moun konfyans yo ki pou jere biwo yo“, se sa li te deklare pandan l denonse ULCC ki pa t menm kontakte l pou konn pawòl pa l.

Pandan tan sa, dirijan Ayiti An Aksyon(AAA) a, te tou pwofite fè tout moun konnen lajan “fèm Latortue” te prete nan lane 2018 nan lona a(70 milyon goud), yo finn remèt li sou yon peryòd 5 lane ak tout enterè (78 884 671 goud)alòske yo te dwe remèt lajan an sou 10 lane. Nan sans sa, responsab la di retire non l pami moun ki pa remèt lajan nan Lona(Ofis Nasyonal Asirans vyeyès).

Ansyen Palmantè a di akoz rezilta yon ankèt Inite Lit Kont koripsyon (ULCC) te pibliye sou manman l an 2020, Carmène Cantave te vinn fè stwòk. Se depi lè sa tou, Madam Cantave te sispann vwayaje, kontrèman ak rapò ULCC a ki te di se depi 2014 dat dènye vwayaj Madam Cantave te fè.

Pou Youri Latortue, tout akizasyon sa yo ki peze sou do l ak rapò sa ki transfere douvan lajistis, se yon fason pou enstans lan pèsekite l akòz l ap fè politik.

Atik sa se pwopriyete prive ©️ Gwoup Medya MAGHAITI 2023

Comments

commentaires