Nan yon videyo k ap tounen sou rezo sosyal yo, rapè ayisyen an tout moun konnen sou non Fantom fè anpil deklarasyon piman bouk, kote li menase bòykote pwogram “Sumfest” ki gen pou fèt nan jou yo la epi li te tou pwofite menase animatè ayisyen an Carel Pedre, kote li di se baton ak bal ki rezève pou animatè “Chokarella”.
Fantom kritike Carel, selon sa li di animatè a pa janm ankouranje rapè ayisyen, men li sòti pou li defann Dadju, paske atis fransè a pa te gen chans jwe Ayiti semenn ki sot pase a jan sa te prevwa fèt. « Ale nan Sumfest la se youn tounen an se 2 », se sa rapè a te deklare pandan li te andirèk sou paj li.
Rapè a te pale tankou bandi yo ki toujou ap fè moun menas: “anba lavil la gen yon mèt, si m di yon nèg p ap desann anba lavil ou paka desann rapè ret rapè. Mas*s*. Ou la pou w kraze rap Carel. Ou sou lis baton ou sou lis bal“, se mesaj sa Fantom voye pou Carel.
Li te pwofite felisite rapè Baky pou gwo espektak li te òganize nan El Rancho a. Li avanse pou li fè konnen, malgre Carel nan estaf Baky a, li prefere plis pale sou Dadju ki pa te gen chans pèfòme olye li fè elòj Baky ki se ayisyen parèy li.
Li ale pi lwen pou li di : pwogram “Sumfest” ki genyen pou fèt 31 jiyè 2022 nan Wahoo Bay, ale ladan li se youn, men retounen an se yon lòt. Atis la pa mete dlo nan bouch li, li te pwofite atake yon seri boujwa kote li di ki plis ap envesti pou fè atis etranje vin jwe Ayiti olye yo ankadre atis Ayisyen nou yo.
Fòk nou di tou, se pa premye fwa Fantom ap menase moun ki nan sektè kiltirèl la. Pandan n ap raple, nan yon layv li te fè ak animatè Leroy apre lanmò bitmekè Fred Hype, li te di atis PIC ak Baky annafè ak li. Kote li te presize se pa bif rap li genyen ak PIC, men se pito bif ponyèt. Li te kontinye ajoute : ” 2 mesye sa yo ak anpil lòt ankò, malgre sa Fred Hype te fè pou yo, li mouri youn ladan yo pa pwononse yon mo senpati ak li”.
Pandanstan, n ap raple tou Fantom atis Barikad Crew a gen gwo akizasyon sou do li, kòmkwa li se youn nan manm òganizasyon kriminèl ki rele « Baz Pilat » nan 3e sikonskripsyon Pòtoprens lan.
Dayè Fantom pa te janm pè afiche li ak youn nan pi gwo chèf gang sa ki rele Ti Grèg la ki se te yon ansyen polisye ak parenn piti li.
Avan gè Matisan an te reprann, ansyen chantè Barikad Crew a te gentan kouri al viv Sen Domeng aprè lapolis te fin tire sou machin li, lè li t ap fè wòklò pou li t al pèfòme pou chèf gang Izo nan Vilaj Dedye. Se nan moman l ap viv kay vwazen an, li te voye yon videyo menas pou yon moun, kote l ap montre yon pil moun sivil dèyè do li ak gwo zam lagè.
Atik sa se pwopriyete prive ©️ Gwoup Medya MAGHAITI 2022
