Yon ti bebe ayisyen ki genyen 11 mwa mouri ayè madi 20 desanm 2022 a, akòz li pran nan kouran nan yon vye priz ki te bò kabann li. Dram sila a pase nan vil Igwe, daprè sa jounal Diario Libre fè konnen jodi mèkredi a.
Daprè enfòmasyon jounal la bay, yo fè konnen ti Bebe a se pitit yon ayisyen ki pote non Evens Jean ki abite Igwe presizeman nan vil Altagrasya, epi se doktè ki bay konfimasyon koz lanmò timoun lan.
“Viktim lan mouri aprè chòk kouran li pran an, selon medsen lejis Rebecca Castillo, aprè l finn gade kò a”
Daprè sa jounal la rapòte, ti bebe sila a te nan yon chanm lè l pran nan kouran nan vye priz la. “Ti bebe a te nan yon chanm sou kabann li lè dram lan pase a selon rapò polis nasyonal la“, se sa jounal dominiken an soulinye san yo pa di si timoun lan te poukont li nan chanm lan.
Pou kounya a aprè tout egzamen doktè Castillo finn pase mò a, ak tout rapò lapolis dominiken deja fè, lajistis deja remèt paran ti bebe a kò pitit Ayisyen an.
Atik sa se pwopriyete prive ©️ Gwoup Medya MAGHAITI 2022
