Anviwon 3 mwa depi albòm Lalin ak Solèy la te soti, fòmasyon mizikal ayisyen an ki rele Zafem kontinye ap fè anpil pale an Ayiti. Jodi jedi 3 dawout la, Ministè Edikasyon Nasyonal bay yon tèks ki sou albòm LAS la nan egzamen literati kreyòl elèv NS4 yo.
Sa gen plizyè semèn depi minis edikasyon an ki se Nesmy Manigat te fè konnen li pa enposib pou yon tèks Zafem soti nan bakaloreya ane sa. Nan sans sa, tèks ki soti nan matyè Kreyòl ane sa se “Dyaman nan Bidonvil“. Nan tèks sa Zafem mande pou pwoteje dwa timoun yo nan peyi a.
“Zafem montre Ayisyen vibre ansanm pi byen an kreyòl, epi rakonte vi yo e konprann istwa yo pi byen an kreyòl. #ALASO ak yon lekòl miltilang: Kreyòl, Anglè, Espanyòl, Franse“, se sa minis edikasyon nasyonal la te pibliye sou rezo sosyal li yo aprè albòm nan te soti.
Se pa premye fwa “MENFP” fè chwa pou pibliye tèks ki gen rapò ak kilti nan egzamen. Nan ane pase yo te gen tèks BIC Tizon Dife, Maurice Sixto ak Franck Étienne ki te soti nan bakaloreya.
Atik sa se pwopriyete prive ©️ Gwoup Medya MAGHAITI 2023
