Kèk jou aprè otorite nan peyi Kenya te anonse yo kapab dirije posib entèvansyon militè nan peyi Dayiti a, Todd Robinson ki se sekretè Deta adjwen ameriken pou zafè estipefyan ak aplikasyon lalwa nan entènasyonal la anonse ayè jedi 3 dawout 2023 a, kenyan yo gen nan plan pou voye ekspè sou teren an nan semèn 19 dawout k ap vini la, selon Miami Herald.
Nan delegasyon sila, responsab ameriken an fè konnen ap gen yon pati nan kenyan sa yo ki prale Etazini pou kontinye diskisyon yo, epi lòt pati a ap gen pou vinn nan Pòtoprens kote yo pral rankontre aktè politik yo epi wè kòman yo kapab ede tout bon vre.
Yon lòt bò, selon deklarasyon Robinson ki te nan tèt yon delegasyon ki t al nan peyi Kenya 22 jiyè pase a, estimasyon pou yon lane misyon sa ap koute sòti nan 200 pou rive 400 milyon dola vèt. Men tou, li di Etazini pap ka rasanble lajan sa pou kont li.
“Si misyon an ap fèt, ap gen verifikasyon sou ofisye yo epi ap genyen yon fòmasyon sou sou kesyon dwa moun avan yo ale“, daprè presizyon responsab ameriken an pote toujou pou jounal Miami Herald la.
N ap raple aprè Kenya ki ap gen 1000 polisye nan misyon sa, Bahamas ap gen 150 moun, mete sou sa Jamayik yo ki jouskounya pa di konbyen y ap gen pou voye. Pandantan sa a, li rete ak Konsèy Sekirite Nasyonzini an pou bay chan lib pou konnen si entèvansyon sila ap kapab fèt nan peyi a vre.
Kredi foto: Afrimag
Atik sa se pwopriyete prive ©️ Gwoup Medya MAGHAITI 2023
