Nan ankèt Inite lit Kont Koripsyon (ULCC) t ap mennen sou fason responsab Otorite Potyè Nasyonal (APN) nan Senmak yo t ap fonksyone, yo fè konnen sòti oktòb 2017 pou rive septanm 2021, gen move lajan ki fèt nan zafè lwe espas pou met machin pou enstitisyon an. Selon ULCC, nan 11 espas APN lwe yo, gen 4 nan yo se nan men menm fonksyonè k ap travay anndan APN yo enstitisyon an lwe espas yo.
Daprè anketè yo sòti oktòb 2017 rive septanm 2021, APN ki nan Senmak la gen 11 kote yo lwe pou met machin. Selon presizyon yo, nan 11 espas sa yo gen yon grenn sèlman ki pou leta, aprèsa rès yo se moun k ap travay nan enstitisyon melanje ak lòt moun ki lwe leta teren yo. Men, jouskounya se grenn pa leta a plis 3 lòt teren k ap sèvi.
Pami non ULCC site yo nou jwenn Garage RGA Terminal ki gen nan tèt li Gregois Valcin ki se administratè Inite Pò Kabotaj(UPC) ak Jhon Alténor ki li menm se kòdonatè Direksyon Jeneral APN. Genyen tou, Garage Marc Donald Terminal ak Chilet Terminal se Karl-Henri Doriélan ki mèt yo pandan l se moun ki jere kès nan UPC tou.
Anplis, yo fè konnen pa gen youn nan kontra lokasyon yo ki respekte règleman ki etabli yo. Men tou, yo soulinye nan tout moun ki lwe APN teren yo se sèlman Karl-Henri Doriélan ki gen bon jan prèv pou di espas li lwe a se pou li tout bon, aprèsa tout lòt yo se lajan, anketè yo di, y ap fè ak tè lòt moun.
Yo idantifye Lenor Exantus kòm youn nan moun sa yo ki lwe Sympa Terminal sòti premye fevriye 2021 pou te rive premye fevriye 2026, san otorizasyon mèt li(Volny Paultre). Selon detay yo, kontra li menm ak APN nan te siyen pou 50 mil dola, men l te gen pou bay mèt tè a 25 mil dola vèt. Konsa, yo soulinye li fè pou kont pa l 20 mil dola ameriken sou pwopriyetè a san bay plis enfòmasyon sou kibò rès lajan an ta fè.
Yon lòt kote pou montre move administrasyon ki gen anndan APN ak UPC, ULCC di konsa, responsab yo te pran plezi yo nan peye teren yo lajan nan men epi an dola vèt, alòske atik 77 arete 16 fevriye 2005 la, di nwa sou blan tout lajan k ap peye kèlkeswa bagay li ye a dwe fèt sou kont bankè oubyen ak chèk. Tandiske, sikilè #029 Bank Repiblik Dayiti (BRH) ki te pibliye 30 avril 2014, fè obligasyon pou tout enstitisyon piblik ki gen kontra ki siyen yo peye an goud.
“sòti oktòb 2017 pou rive septanm 2021, APN Senmak la te peye 576 500.00 dola vèt lajan nan men. Sa se yon vyolasyon sou tèks nou di an e li fè trezò piblik pèdi 57 650.00 dola ameriken lajan sa reprezante 10% nan 576 500.00 yo te bay pou espas sa yo“, selon detay rapò a bay.
Pi lwen, yo revele gen pwopriyetè ki te pwofite monte pri lokasyon a pou nenpòt 25 % parapò ak pri ki te dwe bay yo. Ajan Inite lit Kont Koripsyon yo di yo jwenn gen pwopriyetè 2 teren ki te deside monte pri lokasyon an san okenn eksplikasyon.
“Aprè tout sa yo nou jwenn nan ankèt la, komisyon ankèt la mande pou aksyon piblik mete kont ansyen direktè APN Senmak la Nola Marius pou abi fonksyon, konplisite l nan pran enterè ilegal menm jan lalwa 12 mas 2014 la di l la nan atik 5.5 li a. Li mande tou pou lajistis mache pran aktyèl administratè APN Senmak la, Grégois Valcin moun ki jere kès nan UPC, Karl-Henri Doriélan ak kòdonatè direksyon jeneral APN nan Jhon Alténor dèske yo pran enterè ilegal sa lalwa 12 mas 2014 la kondane nan atik 5.13 li a”, daprè rekòmandasyon yo fè.
Atik sa se pwopriyete prive ©️ Gwoup Medya MAGHAITI 2023
