Nan sousi pou denonse nan fason pa l tout pwoblèm ki nan sosyete nou an, Powèt ayisyen an kèk moun konnen sou non Ti Powèt anonse l ap sòti premye zèv li “Defile Akwifè“, nan dat 2 desanm k ap vini la nan lakou Miyami. Otèz la nan diskisyon li te gen ak Mag Haïti, fè konnen li trete divès sijè nan rekèy sila pami yo nou jwenn koripsyon, analfabetizasyon, pwoteksyon timoun yo, elatriye.
Ti Powèt pote non Ninia Bien-aimé, li se yon jèn ekriven, powèt, kreyatè kontni, manm fondatè ak Sekretè Jeneral Mèb Sèvo (Klèb Lekti), li sòti deja 3 tèks nan 3 antoloji nan peyi End, anba banyè Spectrum of Thoughts. Poutan, malgre li sòti tèks sa yo, li li pot ko janm pran desizyon pou sòti yon liv se pou sa li eksplike nou jounen jodi a li resi pran desizyon sa se pou l kapab make karyè li.
“Defile Akwifè se yon koleksyon ki te ekri depi byen lontan sa, se tèks yo mwen senpleman seleksyone epi m ajoute de twa lòt ki bay rekèy la. Se nan echanj mwen ak manman m mwen te jije l bon vre pou m te gen yon liv ki pibliye, sòti Defile Akwifè se tout yon defi“, daprè sa ekriven an fè nou konnen.
Nan lide pou chache konn poukisa powèt la te chwazi yon tit konsa pou bay liv li a, li fè nou konprann li ka gen plizyè sans. E pami tout sa li te konfye nou yo, li te plis peze nan yon bò sou move sitiyasyon peyi a, epi sou omaj ak pèsonaj istorik Defilée La Folle epi tout fanm k ap fè jefò pou kenbe djanm nan sosyete a.
“Akwifè se yon wòch pèmeyab ki kapab transmèt dlo anba tè. Lè m te fè fas ak imaj la nan rechèch mwen egzakteman jan wòch sa te kenbe dlo a te ban m aspè kò yon fanm ak tout sa sosyete a plante anba po l. Tit liv la reprezante yon seri pwoblèm( analfabetis, koripsyon, Madan Sara yo, pwoteksyon timoun, lanmou ak lanmò, sante mantal), ak enjistis ki pase nan sosyete a. Kidonk, non an se yon kòmantè, yon sitasyon poukont li sou tout sa n ap viv nan tout pwogram defile lavi nou“, toujou daprè eksplikasyon l.
Ak “Defile Akfwifè” Ti Powèt konfye nou li espere sou pwen sosyal pou zèv sa kapab genyen yon enpak ki pozitif sou kominote a, pote kèk pwopozisyon epi kontinye fè gwo refleksyon sou pwoblèm yo nan sosyete a.
Pandantan sa, Ninia Bien-aimé fè tout moun konnen li gen divès lòt pwojè tou, men pou kounya li bay tout moun randevou 2 desanm 2023 sa, nan lakou Miyami(Randy’s Restaurant & Lounge) pou premye vant ak siyati liv li a ki pibliye lakay Rasin Éditions, ki gen nan tèt li Romy Jean François.
Achille Marie Mika
Atik sa se pwopriyete prive ©️ Gwoup Medya MAGHAITI 2023
