Kèk jou aprè asosiyasyon chofè yo te konseye moun pa fè wout matisan an akòz operasyon lapolis t ap mennen, Changeux Mehu li menm anonse jodi mèkredi 24 me a, yo leve mezi sa pwoviswaman. Konsa, li kritike lapolis ki paka frennen aksyon nèg ak zam yo sou wout la.
Nan deklarasyon sendikalis la fè sou Radyo Televizyon Karayib jodi mèkredi a nan jounal Premye Okazyon, li fè konnen operasyon lapolis la pa ede chofè yo nan anyen puiske nan moman an resèt endividi ak zam konn fè sou wout la sòti nan 15 mil goud pou tonbe nan 20 mil goud.
Li soulinye yon bis Okay oubyen Jeremi ki fè 2 vwayaj ale/retou dwe peye 40 mil goud kounya, li eksplike tou chak kote yo gen pri pa yo, toujou selon sa l fè konprann.
“Nou menm nou leve mezi a pwovizwaman yon fason pou popilasyon an ka al chache yon lavi miyò”, daprè sa Mehu deklare pandan l envite moun yo pou fè pridans lè y ap fè wout la.
Yon lòt bò, li eksplike se paske yo menm asosiyasyon chofè yo, yo wè pa gen okenn amelyorasyon ki fèt nan zafè nèg ak zam k ap fè resèt la ki fè yo deside leve mezi sila a. Konsa tou, li soulinye yo pap dakò okenn chofè monte pri kous yo.
Responsab la kenbe yon sèl pozisyon, kote l mande pou popilasyon an rive jwenn bon jan sèvis ak sipò lapolis yo bezwen an tout bon. Li envite moun yo pou leve kanpe pou di non ak sitiyasyon sa, osnon ap toujou gen dezòd e wout Sid la ap toujou ret bloke.
Atik sa se pwopriyete prive ©️ Gwoup Medya MAGHAITI 2023
