Jounen jodi mèkredi 24 me 2023 a, bandi nan Gran Ravin rive fè yon atak nan plizyè lokalite nan Kafoufèy, tankou karidad, Foucha, Wout sou Dal, elatriye. Atak sa lakoz yon elèv lekòl mouri epi plizyè lòt moun blese anba bal malfra sa yo.
Plizyè paran te prese kouri ale dèyè timoun yo lekòl, plizyè lòt moun te prese vit fèmen biznis yo epi plizyè lòt moun te oblije kouri kite kay yo akoz atak bandi nan Gran Ravin, selon sa yon temwen rapòte bay Mag Haïti.
Nan moman n ap ekri an, pyès moun poko ka revele vrè idantite elèv lekòl ki mouri an epi bay nan ki lekòl li sòti. Anplis, pa gen anyen ki di sou kantite egzat moun ki blese anba bal bandi sila yo jounen jodia.
N ap fè nou konnen se gras avèk jefò kèk polisye ak jèn gason nan zòn sila ki te pral repouse bandi sa yo kont atak yo te fè pandan jounen an. Yon batay ki tanmen depi plis pase yon mwa, kote bandi nan Gran Ravin t ap eseye pran Sou Komisarya nan Savann Pistach la epi plase yon chèf nan tèt Kafoufèy la.
Atik sa se pwopriyete prive ©️ Gwoup Medya MAGHAITI 2023
