Nan òdonans ki rann sou dosye lanmò jounalis Néhémie Joseph la, jij Edwige Dorsainvil mande pou ansyen senatè Rony Célestin ak 7 lòt moun ankò pou ale jije douvan tribinal kriminèl. Selon eksplikasyon majistra a, prèv li jwenn yo sifi pou montre enplikasyon moun sa yo nan lanmò jounalis la.
Juste Chandou Clerjeune, Rony Célestin, Elionel Casséus, Angelina Fabiola Cameau, Lochard Laguerre, Douyon Rosevald, Lenel A.C epi Huguens Charles se non moun sa yo jij Dorsainvil voye ale jije douvan tribinal kriminèl an prezans jiri.
” Gen ase chay ak siy ki jistifye enplikasyon yo youn aprè lòt kòm otè, aktè entèlektyèl, epi konplis nan asasinay jounalis Néhémie Joseph. Nou pase lòd pou yo mache pran yo al mete nan prizon vil la si yo pa la deja”, daprè sa defansè lalwa a ekri nan rapò sa ki fèt depi 8 mas 2024 la, men ki resi pibliye nan lannuit vandredi 2 me a.
Yon lòt kote, nan menm òdonans sa jij Dorsainvil mansyone gen divès rezon ki ta lakòz lanmò pwofesyonèl laprès la. Premye bagay la selon li menm, se paske li jwenn viktim nan te gen relasyon lanmoure avèk Angelina Fabiola Cameau, ki idantifye kòm fanm Chandou Clerjeune, ki se youn nan moun ki enplike nan lanmò a tou. Dezyèm rezon an, ta gen lyen avèk pwofesyon jounalis li a.
N ap fè konnen, nan menm dosye sa Yolette Jeanty ak Gary Pierre Paul Charles se 2 moun majistra a di li pa jwenn anyen kont yo ki gen rapò ak ansasinay Néhémie an. Pandantan sa, n ap soulinye nan moun ki enplike yo Juste Chandou Clerjeune li menm deja nan prizon sivil Mibalè a, alòske Angelina Fabiola Cameau epi Elionel Casséus, ki se majistra vil Mibalè a, yo menm yo nan mawon.
N ap raple pwofesyonèl laprès la, Néhémie Joseph te asasinen nan dat 10 oktòb 2019. Kote yo te jwenn kò viktim nan, nan kòf machin li ak plizyè mak bal nan pak Bayàs ki chita kò li nan antre vil Mibalè.
Atik sa se pwopriyete prive © Gwoup Medya MAGHAITI 2024
