Majistra Merlan Belabre te deside tande ayè vandredi 3 me 2024 la, direktè aktyèl Sant Nasyonal Ekipman (CNE),Kineton Louis sou dosye koripsyon anndan enstitisyon leta sa. Li pase douvan jij la aprè yon rapò Inite Lit Kont Koripsyon (ULCC) te site non l nan dosye koripsyon.
“Nou sot reponn kesyon, menm jan lalwa mande sa”, se sa sitwayen an te deklare pandan l te pwofite soulinye se pa sèlman lè moun vòlè lajan gen koripsyon. Men tou, li di materyèl CNE yo ki ta twouve yo nan men kèk patikilye nan fason ilegal se koripsyon tou.
Nan dat 15 novanm 2023, Inite Lit Kont Koripsyon te pibliye yon rapò ankèt kote li te site non plizyè ansyen fonksyonè piblik, presizeman direktè Kineton Louis pou detounen byen piblik.
Enstitisyon sila te pral mennen ankèt anndan Sant Nasyonal Ekipman (CNE), ki te revele gen anpil materyèl ki kraze epi yo pa jwenn. Anplis, li te pral mande pou kou Siperyè Dèkont fè yon entèvansyon adminstratif ak finansye anndan enstitisyon sa.
Akizasyon ULCC kont aktyèl direktè Kineton Louis te pouse ansyen jij enstriksyon nan tribinal Pòtoprens la, jij Al Duniel Dimanche, te mete manda dèyè li. Anplis ansyen kandida pou pòs prezidan an, Jude Célestin nan dat 29 desanm 2023 a. Poutan, se yon envitasyon direktè Kineton Louis pa t respekte.
Aprè tout sa yo, jij Merlan Belabre te pral envite epi rive tande direktè CNE a ayè vandredi 3 avril la. Sa fèt se toujou sou baz akizasyon ULCC yo kòm moun ki ta konplis, epi moun k ap itilize tit li pa genyen ak pou divès ka koripsyon anndan enstitisyon sa.
Atik sa se pwopriyete prive © Gwoup Medya MAGHAITI 2024
