Plizyè prizonye ki te twouve yo nan prizon sivil Pòdepè a, kase prizon an epi chape poul yo nan lannuit vandredi 2 me 2024 la. Selon plizyè abitan nan depatman an, ta gen plizyè nan yo ki jwenn lanmò yo pandan yo t ap eseye sove kite espas la.
Selon Haiti9 News, tantativ pou kase prizon an te kòmanse depi nan anviwon 8è nan aswè, kote yo fè konnen depi lè sa plizyè gwo kriminèl nan Pòdepè te pran lari. Yon lòt kote nan lide pou te kapab rejwenn prizonye sa yo, komisè gouvènman Pòdpè a, Jéir Pierre te pase lòd pou tout abitan antre lakay yo pou evite viktim nan operasyon fòs lòd yo ta pral mennen.
Divès moun nan vil la konfye nou efektivman nan lannuit vandredi 2 me a, te gen anpil kout bal ki t ap chante nan kè vil la. Jouskounya, poko gen chif bò kote otorite yo pou ta konnen konbyen prizonye ki sove ak konbyen ki mouri. Men, plizyè medya lokal fè konnen gen 2 ki ta jwenn lanmò yo epi 11 lòt chape poul yo.
N ap raple dimanch ki te 28 avril 2024 la, 2 prizonye te pèdi lavi yo pandan yo t ap eseye sove nan prizon sivil Ench lan, presizeman nan depatman Sant lan. Nan menm sikonstans sila, 13 moun te blese pami yo 3 ajan nan Administrasyon Penitansyè Nasyonal (APENA), daprè deklarasyon komisè gouvènman an, Marlène Abraham.
Atik sa se pwopriyete prive © Gwoup Medya MAGHAITI 2024
