Nan yon lèt ki sòti ayè mèkredi 9 novanm 2022 a, Senatè depatman lwès la, Patrice Dumont mande prezidan ti rès Sena a, Joseph Lambert pou li ta demisyone. Reyaksyon senatè Dumont vini aprè peyi Etazini ak Kanada sanksyone prezidan ti rès Sena a epi anyen prezidan ògan lejislatif la ki se Youri Latortue pou enplikasyon kòm prezime nan zafè trafik dwòg ak lòt zak kriminèl nan peyi Dayiti.
Nan dat ki te 4 novanm 2022 a, depatman trezò peyi Etazini an te pibliye ak klè nan yon pwen pou laprès tout sanksyon yo pran kont Joseph Lambert ak Youri Latortue epi yo te tou bay rezon ki fè yo akize yo. Daprè deklarasyon sou sekretè pou teyoris ak ransèyman, Brian E.Nelson te fè, li te di: «Prezidan aktyèl ak ansyen prezidan Sena a te pwofite plas ofisyèl yo okipe nan tèt peyi a pou fè trafik dwòg epi kolabore ak rezo kriminèl.»
Pou reyaji fas ak tole k ap fèt sou sanksyon prezidan Sena a pran nan men otorite Ameriken ak Kanadyen yo, Senatè depatman lwès la fè konprann li byen nòmal pou l fòmile demann sa bay Senatè Joseph Lambert. “Lè m konsidere jan kriz total kapital k ap ravaje peyi a vin pirèd akoz gwo frap diplomatik ki touche Sena Repiblik la, mwen wè li nòmal pou mwen mande w demisyone kòm prezidan biwo a“, daprè sa nou wè ki ekri nan lèt Senatè Patrice Dumont an.
Selon sa reprezantan depatman lwès la deklare, aksyon demisyon Joseph Lambert nan tèt 10 senatè ki rete y ap plis jwe nan avantaj li epi l ap penmèt li plis ka defann tèt li lib ak libè, menm jan l kòmanse fè sa.
Konsa li deklare: «Demisyon sa a ta dwè penmèt ou layite kò w pou defann tèt ou rèk chèch, jan dayè ou deklare sa nan radyo plizyè fwa.» Nan menm lèt sa, ansyen jounalis espòtif la anonse gwo diskisyon ak lòt senatè yo nan sousi pou pale plis sou sijè sa a.
Kontrèman ak inosans nan dosye sa senatè Joseph Lambert ap defann depi lè sanksyon yo fin tonbe, chaje afè Etazini an Ayiti, Éric Stromayer deklare sou panèl Magik9, ayè madi 9 novanm lan: «Peyi Etazini gen dosye konplè sou Joseph Lambert ak Youri Latortue.»
Atik sa se pwopriyete prive ©️ Gwoup Medya MAGHAITI 2022
