Nan dènyè jounen gwoup A nan koupdimonn k ap òganize nan peyi Kata, peyi Senegal ak Lawoland rive jwenn kalifikasyon yo pou 1/8èm final jounen jodi madi 29 novanm 2022 a.
Peyi Senegal t ap jwe anfas Ekwatè, yon rezilta ki fini anfavè peyi ki sòti an Afrik la sou yon eskò (2-1). Premye gòl la te make sou penalite kont peyi sidameriken an (1-0,44′) gras avèk Ismaïla Sarr. Nan dezyèm mitan, peyi Ekwatè ta pral jwenn egalizasyon li gras avèk Moisés Caicedo (1-1,67′). Kèk minit aprè peyi Senegal te reprann avataj la aprè li te vin make yon lòt gòl gras avèk Kalidou Koulibaly (2-1,70′). Yon match ki ta pral fini konsa epi penmèt Senegal jwenn yon lòt biyè pou l kontinye rete nan konpetisyon an. Antrenè Aliou Cissé ap tann pwochenn advèsè li pou 1/8è final la.
Sou lòtbò, peyi Lawoland t ap afwonte peyi òganizatè a ki se Kata, kote li te pral louvri eskò a depi nan premye mitan (1-0,26′) gras avèk Cody Gakpo, ki te ofri avantaj la ak peyi li.
Nan dezyèm mitan, peyi koulè oranj lan te pral fè yon lòt gòl aprè yon chout repouse epi Frenckie De Jong te pral jwenn li pou l mete l nan filè a(2-0,49′). Sa ki penmèt li asire premye plas la nan gwoup A, sitou aprè viktwa sa anfas peyi Kata. Peyi òganizatè a pa rive bat okenn match nan konpetisyon an.
Seleksyon Senegal ak seleksyon Lawoland lan se 2 kalifye nan gwoup A, youn fini avèk 6 pwen epi lòt la tèmine avèk 7 pwen nan faz poul la, kounya tou 2 nan gwoup sa ap tann pwochen kalifye gwoup B a pou yo ka konn avèk kiyes yo pral jwe nan 1/8è final. Kidonk, yo 2 a rejwenn lis peyi ki gentan kalifye pou avanse pilwen nan koupdimonn lan.
Atik sa se pwopriyete prive ©️ Gwoup Medya MAGHAITI 2022
