Nan moman komemorasyon fèt drapo peyi d Ayiti a ki make 221 lanne egzistans li, nan dat samdi 18 me 2024 la, gen plizyè machin blennde ki rantre nan ayewopò Entènasyonal Tousen Louvèti a.
Premye kagezon machin blennde yo rantre pou ranfòse kapasite Lapolis nan goumen y ap mennen kont bandi sou tout teritwa nasyonal la. Yo te vin nan yon avyon konpayi Ameriken, ki fè transpò ayeryen «Sky Release Cargo».
Anplis, materyèl Ameriken te pwomèt gouvènman Ayisyen an, li te di l ap bay yon akonpayman militè epi 70 000 dola ameriken ansanm ak plizyè zam san n pa bliye lòt materyèl ankò.
N ap soulinye, nan dat vandredi 17 me ki sot pase a gen plizyè reprezantan ameriken presizeman Sheila Cherfilus-McCormick ak Yvette Clarke ki te fè yon pledwari nan chanm depite a pou yon don 50 milya dola ameriken pou rekonstrui Ayiti sou tèm «Tousen Louvèti». Objektif la se ranfòse enstitisyon demokratik ak jidisyè yo, envesti nan enfrastrikti yo pou ogmante kwasans ekonomik epi amelyore opòtinite pou fanm ak jèn nan peyi a.
Atik sa se pwopriyete prive © Gwoup Medya MAGHAITI 2024
