Avoka Kenyan yo mande Kou Siperyè Lajistis nan peyi Kenya, jounen jodi vandredi 17 me 2024 la, pou bloke deplwayman ofisye Lapolis ki gen pou fèt nan dat 23 pou rive 26 me k ap vini la, selon sa a Reuters rapòte.
«Kou siperyè lajistis deklare vandredi a li te bay lòd pou responsab gouvènman an pran an kont pwosè a epi pran tout dispozisyon pou jij koute dosye a nan dat 12 jen k ap vini la», se sa a jounal Reuters ajoute.
Pandan tan sa a, Kou Siperyè Lajistis nan peyi Kenya te deside, nan mwa janvye ki sot pase a, polisye kenyan yo p ap kapab deplwaye an Ayiti san yon akò resipwosite ak gouvènman peyi k ap resevwa fòs miltinasyonal la.
N ap raple, nan mwa jiyè ki sot pase a, peyi Kenya te anonse l ap voye 1000 ajan lapolis pou vin ede peyi a fè fas ak yon kriz sekirite ki vin pi grav chak jou.
Paralèman prezidan Kenyan an, William Ruto, te siyen yon akò pou vin konbat ensekirite nan peyi d Ayiti nan mwa mas ki sot pase a ak Ariel Henry ki se ansyen premye minis defakto a. Yo te espere yo ta rive satisfè demann Kou Siperyè Lajistis la epi penmèt deplwayman an fèt.
Selon jounal la, avoka Ekuru Aukot ak Miruru Waweru k ap dirije yon pati nan opozisyon nan peyi Kenya ki gen pou non «Thirdway Alliance» te deklare nan aplikasyon yo nan Kou Siperyè Lajistis, jedi ki sot pase a, moun yo akize yo ki gen ladan yo Ruto ak Lapolis te dezobeyi lòd tribinal la lè yo te deside siyen akò resipwosite ak Ayiti.
«Avoka yo di gouvènman an ap fè yon erè grav si l kontinye ak koze deplwayman sa a», se sa a Reuters sinyale. Yo avanse pou di deplwayman an diskite deja e li ka fèt nenpòt ki lè. N ap soulinye, pòt pawòl Ruto a pa t reponn yo tousuit parapò ak tout sa yo t ap di yo.
Pou fini n ap raple, gouvènman Kenyan an te anonse, nan mwa mas ki sot pase a, li te sispann deplwayman an aprè demisyon premye minis Ariel Henry. Semèn pase a, kòmandan Sid militè ameriken an te fè konnen antreprenè sivil yo te rive an Ayiti pou fin prepare lojman pou fòs miltinasyonal k ap gen peyi Kenya, Jamayik, Bayamas, Babad, Benen, Tchad ak Bengladèch ladan l.
Atik sa se pwopriyete prive © Gwoup Medya MAGHAITI 2024
