Nan yon nòt ki parèt nan dat 19 jen 2022, Sektè Demokratik ak Popilè (SDP) pale sou sitiyasyon peyi a ap travèse jounen jodia.
Li deklare ensekirite ak plizyè ka kidnapin k ap fèt dènye tan sa yo, sitou nan Pòtoprens pote anpil kè kase.
Sektè Demokratik Popilè (SDP ) a kontinye pou li di sitiyasyon peyi a montre ak klè :
“Eta vagabondaj leta ayisyen ” toujou selon SDP, pouvwa PHTK ak fanatik Mateli epi Jovenel yo kraze leta pandan dis (10) lane yo sot pase sou pouvwa a “.
Toujou selon menm sektè a : “Palè jistis bandi yo anvayi sou bisantnè depi kèk jou ak zak atak ki fèt sou lokal APN (Autorité Portuaire Nationale) nan mitan kapital la anba je otorite leta yo, pandan yo rete san yo pa fè anyen, montre klèman enpisans leta epi enpòtans oubyen nesesite pou premye Minis Ariel Henry kòmanse deba nasyonal la, sitou sou koze sekirite, estabilite politik, jistis epi bon jan gouvènans peyi a “.
Toujou nan menm nòt sa :
” Pou nou konbat ensekirite ak retounen sou chimen nòmal nou, gouvènman an dwe aji selon sak te deside nan akò 11 septanm 2021 an “.
Ayiti merite yon gouvènman ki djanm selon sa SDP deklare, koz gouvènman ki la twò fèb pou li chanje peyi a parapò ak peryòd difisil peyi ap konnen la.
Anplis, SDP tou pwofite pou li pote soutyen ak kondane tout atak ki fèt kont polisye yo, paske yo deja ap travay nan move kondisyon .
Nou menm SDP, nou panse se leta ki pou vini ak mezi pou konbat zak kidnapin ak ensekirite nan peyi a, puiske li se pi gwo maleng peyi a ap konnen jounen jodia.
Diplis, li ekri nan nòt la :
‘’ Sitiyasyon gang pa si pa la, se travay dis (10) lane PHTK te fè nan tet peyi a, akoz li te nan tete lang avèk kominote entènasyonal epi oligachi ki pa te janm nan enterè peyi a ‘’
li mande pou tout patriyòt yo fè yon sèl leve kanpe kont ensekirite ak kidnapin ki anpeche peyi a mache.
Yon lòt kote SDP mande pou fonksyonman jistis lan retounen byen rapid pou li chita sou respè ak dwa tout moun nan prensip egalite tout sitwayen.
Sektè Demokratik Popilè fè konen li rete fokis sou sa k ap pase anndan peyi a epi kontinye ap mande pou pwosè Petwo Karibe ak masak ki fèt nan katye popilè yo fèt.
Gouvènman an dwe òganize yon konferans nasyonal, mete jistis ak sekirite, ankouraje patisipasyon dyaspora, retou lòd demokratik epi chanjamn kondisyon lavi pèp la selon sa nòt sa di .
SDP konsyan pwoblèm palman an, CSPJ ak prezidans epi fason bagay yo chanje kounya, men li rete kwè se nan dyalòg pou solisyon sòti parapò ak kote nou ye a .
Pandan, n’ap raple SDP se youn nan alye premye minis Ariel Henry, kote li te batay pou li rete sou pouvwa aprè lanmò prezidan Jovenel, malgre ta sanble anpil nan manm Sektè Demokratik ak Popilè a genyen plizyè ministè nan men yo sou baz rekonpans ak pouvwa a, tankou Ricard Pierre ki se minis Planifikasyon jounen jodia.
Atik sa se pwopriyete prive ©️ Gwoup Medya MAGHAITI 2022
