Nan yon kominike yo fè sòti nan lannuit jedi 14 septanm nan, ministè kominikasyon peyi a fè konnen gouvènman ayisyen an ap pran tout dispozisyon pou plèn Maribawou a jwenn dlo rivyè masak la jan sa dwe fèt la. Nan sans sa, otorite yo di y ap fè kou yo konnen pou pwoteje enterè pèp ayisyen an.
Kèk tan aprè prezidan Luis Abinader anonse yo fèmen tout fwontyè yo gen ak Ayiti yo jodi jedi a, gouvènman ayisyen an nan bò pa li ki te voye yon delegasyon pou chache rezoud kriz rivyè masak la, fè tout moun konnen y ap pran tout mezi ki genyen pou ede sitwayen ayisyen yo jwenn dlo jan yo bezwen l la nan vil Wanament.
“Gouvènman Repiblik Dayiti envite popilasyon an pou fè prèv metriz ak kalm epi li vle tout moun konnen l ap pran dispozisyon pou plèn Maribawou rive wouze kòmsadwa anba sipèvizyon Ministè Lagrikilti, Resous Natirèl ak Devlopman nan tèt kole ak ministè Anviwonman”, selon sa otorite yo anonse.
Yon lòt kote pou tout mezi prekosyon, yo lanse yon apèl pou pwoteje lavi ak byen popilasyon ayisyen an ki nan chak peyi yo epi mande pou tout konvansyon entènasyonal ki siyen nan ka sa yo respekte.
Nan kad pou jistifye reyaksyon sila, responsab yo eksplike yo te pito dyalòg fèt ant reprezantan 2 peyi yo, se sa k fè yo te chwazi al rankontre otorite dominiken yo. Jouskaske daprè sa yo mansyone, prezidan dominiken an li menm vinn pran desizyon poukont li pou anonse li fèmen tout fwontyè yo pandan diskisyon yo t ap tanmen nan ministè zafè etranjè dominiken an.
Pandantan sa, gouvènman an deklare peyi a gen tout dwa l pou l eksplwate tout resous natirèl li yo. Deklarasyon sa konsène rivyè masak peyi a pataje ak Repiblik Dominikèn, ki yo menm deja fè 11 priz dlo. Nan sans sa, otorite ayisyen yo fè konprann peyi Abinader la paka anpeche peyi Dayiti pran priz dlo pa l tou.
“Ayiti gen dwa total pou l pran priz dlo selon sa akò 1929, ki siyen ant 2 peyi yo prevwa”.
Atik sa se pwopriyete prive ©️ Gwoup Medya MAGHAITI 2023
