Nan kad rapò Inite Lit Kont Koripsyon(ULCC) te pibliye depi mwa novanm 2023 a, jij Merlan Belabre fè arete jodi jedi 2 me 2024 la, sekretè jeneral Sena a, Marie Nelly Verpile Boyer pou koripsyon. Arestasyon ansyen fonksyonè leta a vini tousuit aprè l te pase anviwon 3è tan ap reponn kesyon majistra a.
“Li te reponn tout kesyon jij la te poze l yo, malerezman jij la jije nesesè pou kenbe l”, daprè deklarasyon avoka l la, Me Gustin Joly ki denonse dezisyon majistra a puiske l deklare “m pa byen wè sa puiske madanm nan te sekretè jeneral apati janvye 2022 pou rive 2023, tout sa ki pase avan li te sekretè jeneral yo m pa wè rezon pou jij la kilpabilize l pa rapò avèk sa yo“.
Yon lòt kote, li soulinye kliyan li an te nonmen se vre nan lane 2022, men te rive pran fonksyon nan lane 2023. Nan peryòd sa yo senatè yo te ale, sa ki selon li menm, eksplike madanm Boyer pa t gen anyen l te ka fè kòm zak koripsyon anndan Sena a. Nan sans sa, defansè dwa moun nan fè konnen yo menm bò kote pa yo, yo pral fè sa yo konnen pou defann Marie Nelly Verpile Boyer.
Menmsi Me Gustin di li pa konn rezon egzat ki mennen jij Belabre arete kliyan li an, nan rapò ULCC a li ekri klè anketè yo te tande Marie N.Verpile kòm sekretè jeneral Sena a sou dosye fonksyonman Sena a ak sou pwosesis ki te konn pèmèt yo bay fonksyonè yo kat debi.
Selon rapò a ki site chif Bank Nasyonal Kredi(BNC), gen 1 693 moun ki te benefisye kat debi nan Sena Repiblik la sòti 2017 sou prezidans Youri Latortue. Yon lòt bò, yo te di tou yo jwenn achak fen ane yo responsab administratif yo te konn bay fonksyonè anndan an prim pèfòmans mete sou kat debi yo a. Nan lane 2022, Inite Lit Kont Koripsyon di gen anviwon 100 fonksyonè ki te jwenn prim sa.
Anplis sekretè jeneral Sena a yo te tande nan dosye sa e ki jounen jodi a twouve l nan prizon, Alande Joseph ki se kontab an chèf, Junette Charles kòdonatris sekretarya jeneral adjwen zafè administratif, Jerry Robert Figaro ki se direktè polis palmantè, Jean Romuald ki li menm se direktè resous materyèl ak entandans, epi sekretè jeneral adjwen zafè administratif, Justin Donald se lòt moun ULCC te tande nan dosye koripsyon sa a.
Atik sa se pwopriyete prive © Gwoup Medya MAGHAITI 2024
