Nan yon nòt Ministè Edikasyon Nasyonal ak Fòmasyon Pwofesyonèl (MENFP) pibliye jodi jedi 2 me 2024 la, li enfòme tout moun ak manm kominote edikatif la, li deside retire lisans pou dirije ak anseye Anebert Joseph. Pèsonaj sa se direktè Lekòl Nasyonal «Béthel Béthesda», MENFP pran desizyon sa aprè zak vyolans grav li te fè sou yon timoun nan lekòl li.
« Ministè a pran mezi sila aprè rapò li jwenn ki sòti nan direksyon depatmantal Nòdès ki konfime zak vyolans grav ki fèt sou yon timoun anndan lekòl la nan dat 22 avril 2024 la», se sa Ministè Edikasyon Nasyonal ak Fòmasyon Pwofesyonèl ekri nan nòt la.
Yon konpòtman ki te deja denonse sou divès platfòm rezo sosyal yo, kote moun yo te fè apèl avèk MENFP parapò avèk move reyaksyon direktè lekòl sa sou timoun nan. Selon videyo ki te pataje sou rezo yo, direktè Anabert Joseph te bat ak igwàz elèv la akòz li te pran lwa anndan lekòl la. Nan deklarasyon l te fè nan moman sa « O non Jezi mwen chase w», se tankou baton an t ap retire lwa a nan tèt viktim nan.
Anplis, ministè a anonse gen lòt mezi administratif ki pral pran aprè rapò enspeksyon jeneral edikasyon fin antre pi fon nan ankèt la. Nan ka sa, responsab yo di yo pran tout dispozisyon pou bay timoun sa a ankadreman sikolojik ki nesesè pou evite dega nan pakou eskolè li.
Pou fini, MENFP mande tout direktè lekòl respekte dwa tout timoun yo genyen pou yo aprann san vyolans anndan lekòl yo.
Atik sa se pwopriyete prive © Gwoup Medya MAGHAITI 2024
