Nan ankèt lajistis ayisyen ap mennen sou divès rapò Inite Lit Kont Koripsyon te sòti mwa pase yo, jij Al Dunel Dimanche envite 2 ansyen prezidan ak plizyè wo fonksyonè leta pou al reponn kesyon li. Selon Radio Métronome, jij la mete antou 36 manda dèyè moun ki ta enplike nan dosye koripsyon sa yo.
Pami moun li vize yo nou jwenn ansyen prezidan Michel Joseph Martelly ak Jocelerme Privert. Yon lòt kote, li envite 8 ansyen premye minis tankou Jean Max Bellerive, Laurent Lamothe, Joseph Jouthe, epi nou jwenn tou ansyen minis Joaceus Nader ak Florence Duperval.
Nan lis sa nou jwenn tou, kèk ansyen palmantè tankou Willot Joseph, Clovis Obas. Nan menm kad dosye sa jij Dimanche nan yon òdonans li te fè depi 22 desanm 2023 , ki pibliye ayè jedi a mande pou otorite polisyè yo arete Jude Célestin ak Kenton Louis ki se youn aprè lòt ansyen ak nouvo direktè jeneral Sant Nasyonal Ekipman yo (CNE). Nan òdonans sa, li presize malgre tout envitasyon l te fè yo youn nan yo pa t parèt.
Ansyen kandida pou pòs prezidan an gen akizasyon ki peze sou do l kòm moun ki ta konplis nan detounman byen piblik, alòske Kenton Louis li menm akize kòm moun ki konplis tou. Men nan ka pa li a, se kòm moun ki pa t gen okenn pouvwa pou komèt yon move zak, men ki fè l kanmenm (izipasyon fonksyon).
Atik sa se pwopriyete prive ©️ Gwoup Medya MAGHAITI 2023
