Menm jan ak eta Colorado, Eta Maine fè konnen ayè jedi 28 desanm 2023 a, yo retire tout bilten vòt Donald Trump yo pou eleksyon primè yo Etazini. Se sekretè deta vil la, Shenna Bellows ki pran desizyon sa nan yon dokiman li prezante ki site divès responsabilite ansyen prezidan ameriken an genyen ak dega ki te fèt nan Kapitòl 6 janvye 2021 an.
“Li pa merite pou pran fonksyon prezidan menm jan 14yèm amandman konstitisyon an retire pouvwa, tout moun ki te fè move zak leve kanpe kont yon pouvwa ki etabli, pou yo ta pran responsabilite piblik”, daprè sa sekretè deta Maine nan ekri nan dokiman sa divès medya entènasyonal site. Shenna Bellows se moun ki responsab pou òganize eleksyon nan Eta pa li a.
Pi lwen otorite a di konsa, atak nan Kapitòl la pa t sèlman fèt sou lòd Trump, men li di tou li te konnen tout plan an e li te bay patizan li yo tout èd yo te bezwen pou fè zak la. Donald Trump li menm pat pran tan pou reponn nan bò pa li, kote l kondane ak tout fòs li desizyon sa ki pran an paske selon li menm se yon menm ekip prezidan Joe Biden ki dèyè retire eleksyon 2024 yo nan men l.
“Se yon moun gòch tout bon ki pran desizyon an, e se yon gwo patizan Joe Biden. N ap gade kounya kòman y ap tante vòlò eleksyon an epi eseye retire nan men nou dwa pou yon elektè ameriken vote“, daprè sa ekip k ap fè kanpay pou Trump la deklare nan non l.
Paralèlman, malgre desizyon sa pa gen anyen ki di l ap toujou ret kenbe, puiske jouskaprezan ni eta Colorado ni eta Maine bay Donald Trump posibilite pou defann tèt li douvan lajistis ameriken. N ap raple Michigan ak Minnesota se 2 eta ki te derefize pwosesis sa ki tanmen nan divès eta nan Etazini, e ki vize retire gwo kantida favori repibliken yo nan kous primè eleksyon yo.
Atik sa se pwopriyete prive ©️ Gwoup Medya MAGHAITI 2023
