Ralph Dominique, yon ayisyen ki bay tèt li pou avanse ak jèn e pataje sa ki pozitif avèk yo

Aprè yon karyè ki te pwomèt anpil nan domenn komedi, Ralph Dominique anpil moun te konnen sou non Gwo Gera, chwazi lanse yon kanpay pou soutni ide jèn yo nan nenpòt domèn yo ta anvizaje evolye. Jèn gason sa k ap viv an Repiblik Dominiken vle pataje ide epi avanse ak moun k ap evolye, sitou nan milye kiltirèl la, yon fason pou li akonpanye yo epi gide yo nan desizyon y ap pran.

Ralph Dominique se yon jèn antreprenè ki kolabore ak anpil atis ayisyen nan kad pwojè. Menmsi li p ap viv Ayiti, sa pa anpeche li kenbe menm objektif li yo.
“Paske mwen se yon jèn ki angaje. Sa vle di gen angajman ou pran epi ki valide, ou paka bay vag. Menmsi sa ta rive ou chanje peyi, ou chanje wout, men ou p ap janm ka chanje vizyon an”, se deklarasyon jèn gason sa.

Pami jèn li kolabore avèk yo deja, nou ka site sa yo : FIP prezidan, Three T , Squeezy Ramses ak Lighter Cjf. Li te kòmanse ak yon pwojè ki rele Grow Grind ki se yon mouvman kote li pataje sa ki pozitif.

“Mwen engaje m kòm yon gid nan karyè yo, pandan m t ap ede yo pa aji ak emosyon epi jere bidjè yo byen nan tout sa y ap fè pou yo pa regrèt demen. Vizibilite mwen te genyen an mwen ba yo li, anplis sijè y ap trete nan mizik oubyen sa y ap vann nan domenn grafik li vin atire plis, paske premye reyalite vizibilite se sa w ap vann nan“, se sa Ralph di nou.

Selon sa jèn gason an fè nou konnen: «Pwojè sa ap rebalanse nan yon ti tan ki pa long avèk lòt talan ki nan pwovens. Li anvizaje kòmanse nan vil Jakmèl».

Ralph Dominique se youn nan pwopriyetè yon ajans imobilye nan Repiblik Dominiken.
“Se pa sèlman pou nou vann kay, men pou nou entwodui nou epi fè Ayisyen yo konnen kisa ki imobilye a tou. N ap travay sou lòt pwojè k ap vini epi n ap kontan pataje yo”, selon Ralph Dominique ki di pou finansman li depann pwojet a ak vizyon an tou. Paske, selon li se vizyon ki bay plis kòb.

Lè nou poze l kesyon sou rezon ki fè se Jenn yo ki entèrese li? li reponn nou konsa: «Jèn yo plis entèrese m, paske chak moun k ap vanse dwe gen yon modèl, yon moun ki pa gen pwoblèm pataje enèji li avèk w alòske se sa mwen bay tèt mwen kòm misyon”.

Li kontinye pou li di : «chak Jenn yo se avni yon peyi, yon fanmi, yon istwa, si pa gen jenn pa gen avansman. Kòm yon jenn, mwen pare epi m ap toujou entèrese ak jenn parèy mwen. depi se pou goumen pou yon mouvman pozitif epi ki byen defini“, se sa li deklare.

Atik sa se pwopriyete prive ©️ Gwoup Medya MAGHAITI 2022

Comments

commentaires