Bandi nan G9 toujou kontwole Tèminal Vare a

Tèminal Vare ki se Sant estokaj gaz peyi Dayiti, li sou kontwòl G9 jiska jounen jodi Vandredi 29 Septanm 2022 a, nan komin site Solèy.

Depi aprè plizyè jou manifestasyon popilasyon an kont ratman gaz, lavi chè, ensekirite, elatriye, chèf G9 la ki se Jimmy Cherizier alyas Babekyou te pran lari tou epi anonse pou chèf Primati Ariel Henry kite tèt peyi a avèk tout alye li yo. Sa ki ta pral lakoz li pran santral gaz la avèk tout alye li yo, epi mete pinga pou lapolis pa vin dèyè gaz anba a.

Poutan, premye minis defakto Ariel Henry te anonse depi plis pase yon semenn, gaz la ap distribye nan tout ponp nan peyi a, nan dat 18 septanm 2022. Sa ki te lakoz aprè adrès avèk Lanasyon an, depi nan lannuit yon gwo mobilizasyon nan plizyè vil pwovens ak nan kapital la, kèk jou gwoup G9 te chwazi pran kontwòl Tèminal Vare ki se youn nan sant estokaj gaz nan peyi a ki chita kò li nan komin Site Solèy.

Sant estokaj gaz sa, fè distribisyon depi nan dat 12 septanm ki sot pase a nan peyi a, selon pawòl responsab yo.

Nan yon lòtbò, konpayi telekominikasyon yo (Digicel ak Natcom) anonse y ap fèmen pòt yo depi pwoblèm gaz la kontinye konsa, menm jan plizyè lòt enstitisyon kou Lopital, radyo, elatriye sispann ak osnon redui nan sèvis yo.

N ap raple Tèminal vare gen ladan li pou kounya 4983 426 galon dyezèl, 816 228 galon kerozenn epi 5162 346 galon gazolin. Poutan chèf G9 Jimmy Cherizier, deklare: « Se lè premye minis Ariel Henry kite tèt peyi a gaz la ap ka sòti anndan Tèminal vare a».

Nan moman la, plizyè moun ap fè mache nwa avèk gaz la, sa k ap vann gaz la nan pri 2500 goud jiska 5000 goud.

Malgre, lapolis ap eseye fè kont jefò pou li wè si li ta degèpi bandi yo nan Sant estokaj gaz Tèminal vare a.

Atik sa se pwopriyete prive ©️ Gwoup Medya MAGHAITI 2022

Comments

commentaires