Nan yon rapò ki sòti ayè jedi 2 me 2024 la, Pwoteksyon Sivil ak Sant Operasyon Ijans di gen 13 moun ki mouri nan vil Okap ak plizyè kay kraze sa ki pran dlo, jedi 2 me pase a nan zòn Labori (Baryè Boutèy). Alòske premye me a, nan ri Lopital sou zòn Pòdpè, ajan ki ap travay nan depatman an te deja fè kwè gen 3 moun ki pèdi lavi yo nan yon deboulonnay tè ki te genyen.
«Plizyè kay tonbe nan glisman teren, nan Sidwès sant vil Okap la ki fè gen 12 moun ki mouri. Yon fanm 50 lane epi yon jèn 18 lane”, daprè chif ki bay nan premye bilan sa. Poutan, yo pa presize nan ki sikonstans 13yèm moun ki viktim nan pèdi lavi l nan blòk Nò a.
Pou sa ki konsène kay ki pran dlo yo, otorite yo di gen 2 260 kay an total epi 25 lòt kraze. Yon lòt kote, responsab Pwoteksyon sivil yo mansyone gen anpil bèt dlo pote ale ak jaden ki ravaje, sitou nan zòn Sèka lasous (Cerca la Source) kote pon Maselis la kraze epi dega ki gen nan zòn Wo Okap.
«Nan Nò, premye konsta yo bay gen 2 225 kay ki pran dlo ak 15 kay ki kraze anndan komin nan. Komite santral Sèka lasous, nan Sant, jwenn 10 kay pran dlo, pou pi piti 7 lòt kraze.», selon sa yo di. Yo soulinye pi douvan, nan Latibonit ak Sidès vil tankou Sen Michèl Latalay, Peredo kèk kay anvayi ak dlo tou.
Fas ak sitiyasyon sa, Direksyon Jeneral Pwoteksyon Sivil (DGPC) fè plizyè rekòmandasyon ak estrikti ki ap jere dosye sa yo nan peyi a.
“Mete men an ijans nan asenisman, kiraj ak kanalizasyon nan vil prensipal yo, kontinye travay sou netwayaj zòn yo, mennen aksyon pou evite vye maladi, jwenn lajan ak materyèl pou enfòme piblik la, mennen kanpay sansibilizasyon avan sezon siklòn nan, epi siveye tout fenomèn Idwometeyowolojik yo”, se tout sa yo, yo mande pou estrikti yo fè.
Atik sa se pwopriyete prive © Gwoup Medya MAGHAITI 2024
