Nan yon nòt 23 òganizasyon peyizan pibliye jodi madi 18 avril la, yo rive denonse tout responsab ki dèyè zak vyolans bandi ap fè sou pitit tè a nan objektif pou fè yo kite kay yo epi pran tè yo posede yo. Aprè tout konsta òganizasyon sa yo fè, yo fè konnen yo pran rezolisyon pou goumen kont moun sa yo kote yo vize batay pou tabli yon lòt mekanis pou sosyete nou an.
Pifò nan òganis sa yo tabli baz yo nan Papay, nan depatman Sant peyi a. Nan tout sa yo chwazi site nan nòt sa, yo rive denonse ni prezime gang k ap vòlè tè ak byen malerèz, men tou yo lonje dwèt sou gouvènman an ki malgre tout aksyon sa yo ap pase pa janm tanmen fè yon jès pou kwape zak banditis sa yo.
“Nan peyi pa nou atoufè tout plim tout plimay ap vare sou tè peyizan yo ak anpil vyolans nan plizyè depatman nan peyi a. Otorite yo rete bèbè, e souvan yo patisipe e yo kore vyolans gang yo pou mete peyizan deyò sou tè yo e nan kay yo”, daprè sa yo di.
Pi devan toujou, yo fè konprann se yon estrateji rejim PHTK a itilize yon fason pou bay konpayi transnasyonal yo plis teritwa. Yo menm rive di, rejim nan ap fè tout sa k depann bò kote yo pou eseye chanje konstitisyon 1987 la pou move zak yo ka fèt pi byen toujou. Konsa, nèg ak zam pa sispann mache pran tè nan tout rakwen peyi a, patikilyèman nan depatman Lwès, Nòdwès, Nòdès, Latibonit, ak nan Sant, selon sa yo soulinye.
Nan yon bò, yo rive denonse gouvènman an nan plizyè fasèt, tankou kontra ki ta siyen ankachèt pou fè kado yon pati nan teritwa nasyonal la, akò 21 desanm nan ki se yon lòt fas pou twouble vijilans pèp la. Yo lonje dwèt yo tou, sou enstans entènasyonal ki rele “Core Group” la, ki daprè yo menm, pèmèt prezime bandi jwenn zam ak bal pou montre nivo enfliyans yo nan peyi a kote pa gen pyès moun ki ka mennen aksyon kont yo.
Yon lòt bò, yo pran rezolisyon pou batay kont fenomèn vòlè tè sa, pou tout peyizan ka jui dwa pou yo plante alèz. Nan sans sa, yo anonse yo pral mete sou pye divès estrikti pou rekanpe mouvman sosyal yo, kote y ap tanmen defann dwa peyizan yo epi antre nan batay pou chanje peyi a.
Pou lis òganizasyon ki siyen nòt sa genyen: PAPDA, Tèt Kole, MPNKP, KROS, Rezò Nò ak Nòdès, Brigad Desalin, CELG, Kay la, APFAM, Remanbre Ayiti, MJH, RNDDH, PFL, MODEP, Petrochalenger Hinche, ANC(Rep dominikèn), MOPS, PLAODA, Ti plantè, Rezo Agwoekolojik, ak MPP.
Atik sa se pwopriyete prive ©️ Gwoup Medya MAGHAITI 2023
