Anviwon 15 jou aprè premye atak popilasyon Kakoufèy la te sibi anba men endividi ame, sòti nan lannuit jedi 24 dawout la pou rive jodi vandredi a, abitan yo fè konnen yo viktim yon nouvo atak. Daprè enfòmasyon ki disponib yo, ta gen moun ki viktim e gen yon latriye lòt ki oblije kouri kite zòn pi pwòch yo.
Nan divès temwanyaj Mag Haïti jwenn, moun yo fè nou konnen divès moun kouri kite kay yo nan zòn Kafoufèy akoz dènyè atak bandi yo, sitou aprè nouvo atak sila a. Paralèlman, moun yo pa sispann kritike lapolis yo di ki pa janm aji jan sa ta dwe fèt alòske yo ta dwe entèvni pou ede pèp la.
“Sa k ap pase Kafoufèy la yo tout wè l, polisye yo la sou chanmas la“, se sa youn nan abitan yo deklare pandan plizyè lòt fè kwè se yon mwayen gouvènman Ariel Henry a ap chache pou jistifye yon entèvansyon militè nan peyi a.
N ap raple, Ministè Jistis ak Sekirite piblik la(MJSP) te anonse madi pase a, lapolis la te deja jwenn lòd pou aji nan nenpòt zòn kote popilasyon an an danje. Sa ki ta enkli zòn Kafoufèy tou ki jouskaprezan anvayi anba prezime bandi.
Atik sa se pwopriyete prive ©️ Gwoup Medya MAGHAITI 2023
