Nan yon manifestasyon ki t ap dewoule nan komin Petyon vil jounen jedi 29 septanm 2022 a, ansyen direktris Sèvis Metropolitèn Kòlèk Rezidi Solid (SMCRS) la, Magalie Habitant pran anpil baton ak menm rive blese.
Tankou sa te anonse pou semenn lan, aprè 3 jou grèv responsab sendika chofè yo, manifestasyon yo te rapousib pou rive jiska jounen jodi a. Kidonk, manifestan yo pa te neglije foule beton an nan divès vil ak komin peyi a, kou sa te ye nan komin Petyon vil. Daprè yon videyo k ap sikile sou entènèt la montre ak klè kijan Magalie Habitant se youn nan moun ki rive viktim pandan jounen sa a kòm ansyen responsab nan leta.
Manifestan nan Petyon vil yo pa te neglije defoule yo sou ansyen direktris SMCRS la, ki pran anpil baton epi menm rive pran yon kout kouto bò dèyè li.
Se pa premye fwa manifestan yo montre rayisman yo pou Magalie Habitant. Si noy raple jou ki te 22 dawout 2022 a, pwotestatè nan dèlma te kouri dèyè ansyen direktris la ak kout wòch, se te gras ak lapolis yo pa te rive maspinen ansyen direktris la. Anpil nan manifestan yo te di Magalie pa merite pou li nan mouvman mas la, paske daprè yo menm ansyen direktris SMCRS la se yon manman chat.
Nan lane 2021 an, ansyen direktris SMCRS la te jwenn yon dokiman jidisyè ki te kondane li nan men Kou Siperyè Dèkont ak kontansye administratif (CSC/CA), akoz move jesyon li menm ak kèk lòt manm nan administrasyon li an nan tèt enstitisyon li t ap dirije a. Nan dokiman jidisyè sila a, Kou Siperyè Dèkont ak kontansye Administratif te fè konnen Magalie Habitant gaspiye 38 milyon goud nan lajan trezò piblik la.
Atik sa se pwopriyete prive ©️ Gwoup Medya MAGHAITI 2022
World
Discussion about this post