Jounen lendi 15 me 2023 a divès militan nan dezyèm vil peyi an foule beton an pou manifeste kont vini premye minis defakto Ariel Henry nan kad selebrasyon 18 me k ap vini la.
«Pèp Okap pa nan gang, Ariel Henry lè nou grangou n pa jwe», se chan kèk militan t ap chante pou eksprime dezakò yo kont Ariel Henry k ap vini fete nan vil Okap.
Anplis, pwotestasyon nan lannuit 14 me a, kote plizyè moun te mete dife ak manifeste pou eksprime move kontantman yo kont premye minis Ariel Henry k ap vin fete 18 me nan vil Okap olye komin Akayè.
«Nou gen plis pase 1 lane san kouran, pwofesè paka touche epi anpil moun nan grangou nan peyi an. Nou konn viv, nou pran desten nou an men. Jistis pou tout moun, sitou avèk lapolis», se deklarasyon yon militan nan kad mobilizasyon sa.
Sou lòtbò a plizyè lòt pèsonalite piblik tankou Elysée Blais ak doktè Schiller Louidor denonse desizyon premye minis defakto a, Ariel Henry, pran kote li chwazi delokalize fèt 18 me a pou li voye li nan vil Okap olye vil Akayè, kòmkwa se kouri l ap kouri pou bandi Kanaran nan peyi an.
«Sa Ariel vle al fè Okap la, se pousib pou dekonstrui sa n rele moun Ayisyen an. Sa a p ap pase konsa. Nou di pito plis masak fèt sou Ariel, misye se yon asasen. Se pou n ogmante mouvman Bwa kale a sou li», se deklarasyon doktè Louidor sou radyo Méga.
Atik sa se pwopriyete prive ©️ Gwoup Medya MAGHAITI 2023
