Nan kad preparasyon festival 18 me 2023 nan depatman Nò, presizeman vil Okap, yon manb Komisyon minisipal Site Kristofyèn nan ki se Patrick Almonor fè konnen genyen 25 milyon goud ki prevwa pou ekleraj festival 18 me a.
Patrick Almonor te fè deklarasyon sila jounen jodi 15 me 2023 a, sou radyo Magik 9. « Lamèri prevwa yon bidjè 25 milyon goud pou penmèt yo jwenn ekleraj epi mete 500 lanpadè pou klere vil la. Konsa tou nou ka jwenn 17 oubyen 18 milyon goud», selon pawòl Almonor.
Pou penmèt reyalizasyon divès aktivite k ap fèt 18 me sila, plizyè enstitisyon ap kontribye nan òganize fèt sa, tankou Lamèri ak Ministè lakilti ak Kominikasyon epi Ministè Travay Piblik ak Transpò epi Kominikasyon ( TPTC).
«Nou pral gen yon seremoni k ap sou lidèchip Ministè Lakilti ki prevwa onore plizyè tèt ak pèsonalite pou mete an valè, puiske enstitisyon sa konsakre ane sa pou patrimwann», nan kad avanse majistra adjwen Patrick Almonor.
Toujou selon responsab la «se pa pral sèlman fèt drapo men li pral fèt pwofesè lekòl yo tou. Lè sa nou pral gen plizyè defile lekòl ak parad epi pwofesè n ap onore jou sa.»
Fèt 220 lane drapo a ta dwe fete nan vil Akayè kòm tradisyon, men leta Ayisyen deside chanje li vil akoz bandi Kanaran ap opere nan zòn sa depi kèk tan.
N ap raple depi ayè dimanch nan lannuit plizyè moun nan Komin Okap te leve kanpe pou pwoteste dezakò yo pou vini premye minis defakto Ariel Henry nan vil sa, kote te gen dife ak barikad ki te mete sou kèk wout, tankou Baryè Boutèy.
«Tout bagay OK kounya gras avèk entèvansyon Lapolis, tout bagay sou kontwòl. Gen bagay ki dwe fèt parapò avèk kèk konsène nan vil la», selon sa Patrick Almonor.
Atik sa se pwopriyete prive ©️ Gwoup Medya MAGHAITI 2023
