Jodi Madi 13 Septanm 2022 a, anpil zonn nan kapital la ak plizyè vil peyi a kòmanse bloke depi byen bonè nan maten pou fè fas ak ogmantasyon pri gaz la Premye minis Ariel Henry te anonse depi dimanch 11 Septanm pase a.
Depi byen bonè maten an, plizyè enfòmasyon fè konnen gen anpil zonn ki gentan genyen anpil barikad, tankou zonn pou soti Petyonvil pou ale desann Delma, Lali elatriye. Jan sa konn ye byen bonè nan kapital peyi a, gen kèk zonn ki pa genyen anpil moun ak kamyonèt nan lari a.
Youn nan rezon ki fè moun kòmanse bloke chak ti zonn yo, se paske premye minis defakto Ariel Henry te anonse pri gaz la pral monte nan mèkredi ki pral vini la. malgre anpil moun te pran lari nan jou pase yo kont ratman ki te deja genyen nan preske tout peyi a.
Pou maten an poko genyen pyès mobilizasyon ki fèt, poko gen kawoutchou k ap boule, pa genyen pyès dezòd men sèlman gen kèk kote moun yo kòmanse bloke lari a ak gwo wòch, fatra epi tout sa ki ka anpeche moun ak moto, machin travèse.
Depi ayè lendi a, plizyè moun nan zonn Dèlma pa te kache kòlè yo aprè pawòl premye minis la sou ogmantasyon pri gaz la. Yo te deside pran lari a. Plizyè wòch t ap tire ak anpil moun ki t ap sòti nan aktivite yo te oblije pran wout al ak pye yo pou rantre lakay yo.
Se pa sèlman nan Pòtoprens moun yo kòmanse bloke, men genyen anpil vil nan peyi a, tankou Tigwav, Okap ki kòmanse bloke pou denonse tout vye zak ensekirite, kidnaping, lavi chè ak ratman gaz la, elatriye. Anplis, plizyè sitwayen nan vil Jeremi anonse jodi madi 13 Septanm lan yon jounen grèv pou menm kòz yo.
Atik sa se pwopriyete prive ©️ Gwoup Medya MAGHAITI 2022
