Nan yon rapò yo pibliye jodi mèkredi 24 avril 2024 la, Biwo Nasyonzini pou Kòdinasyon Zafè Imanitè yo (OCHA) fè konnen pou mwa mas ak avril sa a gen plis pase 19 300 ti moun ki kouri kite kay yo akòz vyolans gang yo. Selon yo menm, chif ti moun sa yo fè pati anviwon 95 000 moun ki chape poul yo akòz ensekirite a.
« Ant 8 mas ak 9 avril, gen prèske 95 000 moun, ladan yo gen plis pase 19 300 timoun ki kouri kite lakay yo nan kapital la ak nan zòn ki sou kote yo», daprè chif Òganizasyon Migrasyon Entènasyonal (OIM) site nan rapò a. Mete sou sa a, yo fè kwè majorite moun sa yo ki kite Pòtoprens pou mwa mas la se moun ki te gentan kouri ale nan lòt zòn deja.
Pi lwen, yo di kon sa a pa rapò ak 19 300 ti moun yo anrejistre yo, yo jwenn chak jou gen pou pi piti 600 timoun ki kite lakay yo. Se sa k fè direktris Save the Children nan, Chantal Sylvie, mande pou kominote entènasyonal la pote èd ekonomik yo pou yo menm ka jwenn mwayen nesesè yo pou ede sove lavi an Ayiti. Yo presize depi fevriye 2024 la, estrikti yo a deja soutni plis pase 2 000 ti moun ki nan zòn Sid ak Grandans la.
«Li enpòtan pou òganizasyon imanitè yo gen aksè san limit pou bay èd epi sove lavi nan zòn ki tèt anba ak konba chak jou yo», li kontinye pou l voye yon mesaj ijan bay entènasyonal la paske l panse yo ta dwe ogmante lajan yo konn bay yo, ki pou kounye a egal ak 8% nan èd y ap distribiye yo. Anplis, direktris la fè konnen sitiyasyon sa ap atake lòt rejyon toujou, kidonk sa a pral mete lavi plizyè lòt moun an danje.
«Tout pati yo dwe fè sa yo konnen ki posib pou pwoteje lavi ti moun yo epi respekte dwa entènasyonal imanitè yo», daprè deklarasyon responsab òganizasyon Save the Children nan. Li te tou pwofite denonse move lavi ti moun yo ap mennen nan kan pou refijye yo.
Atik sa se pwopriyete prive ©️ Gwoup Medya MAGHAITI 2024
