Aprè yon rankont yo te gen ant yo vandredi 22 septanm 2023 a, otorite meksiken ak ameriken yo deside siyen yon akò pou depòte tout migran yo ta jwenn sou fwontyè amerikano-meksiken an. Konsa, responsab meksiken yo ta ap negosye ak gouvènman plizyè peyi pami yo Nikaragwa pou ta resevwa tout migran ki gen nasyonalite etranjè yo selon CNN.
“Meksik siyen yon akò ak Etazini pou voye tounen, tout migran yo jwenn nan tout vil fwontalye yo, nan peyi yo sòti a“, daprè sa jounal ameriken an fè konnen. Se yon desizyon ki konsène anpil ayisyen ki pandan jou sa yo deside pase pa Nikaragwa pou antre Etazini. Poutan, nan kondisyon pwogram imanitè Pawòl la yo te prevwa kèlkeswa migran yo arete ki ilegal sou fwontyè a depi yo depòte li posib pou l fè 5 lane san l pa janm ka rive pile teritwa ameriken an.
“Peyi Meksik ta ap negosye ak gouvènman peyi Brezil, Kiba, Venezwela, Nikaragua, Kolonbi. Negosiyasyon sa yo ap fèt se nan kad pou chak peyi sa yo ta konfime yo resevwa migran ki gen rapò ak peyi yo sòti ladan l la“, toujou daprè sa jounal la fè konnen.
Konsa, otorite meksiken yo pran divès lòt mezi pou ta anpeche migran ki sot nan peyi sa yo pou pa pase sou teritwa yo pou yo pa ta al travèse al Etazini.
Nan sa ki konsène mezi yo, responsab meksiken yo te sispann madi 19 septanm nan, aktivite 60 tren nan antrepriz Ferromex akòz yo estime gen anpil migran ki itilize tren yo pou antre sou tè ameriken yo. Mete sou sa, yo pase lòd pou jwenn rapò chak jou sou migran ki pran tren yo, yo mete tou yon sistèm kontwòl nan liy tren yo ak tout otowout yo.
Nan bò pa Etazini, responsab yo te deside fèmen pon Eagle Pass la(pon ki relye Meksik ak Teksas), epi voye 800 sòlda mete sou 2 500 ki te gentan ap jere fwontyè amerikano-meksiken nan.
Selon deklarasyon yon pèsonalite ministè sekirite enteryè ameriken an, gen plis pase 8 600 migran ki fè fwontyè a chak jou. Kote gen 8 000 lòt otorite yo te arete lendi pase a. Poutan, arestasyon sa yo pa rive frennen moun k ap antre Meksik yo puiske minis zafè etranjè meksiken an, Alicia Bárcena te deklare nan lONI vandredi pase a, yo akeyi chak jou anviwon 6 000 migran ki sòti nan amerik Santral la.
N ap soulinye, Enstiti Nasyonal Migrasyon yo nan peyi Meksik voye tounen 788 000 migran divès nasyonalite nan peyi yo sòti a, sòti premye janvye pou rive mwa septanm sa.
Atik sa se pwopriyete prive ©️ Gwoup Medya MAGHAITI 2023
