Rapè Ayisyen ak ameriken an Kodak Black, retounen nan prizon nan peyi Etazini jodi 7 desanm 2023 a, aprè lapolis ta jwenn kokayin sou li. Selon Miami Herald, gen divès akizasyon ki peze sou do rapè a kounya la, alòske li poko menm fin konbat dosye yo te akize l nan lane 2022 yo.
Selon jounal Ameriken an, nouvo arestasyon Bill Kahan Kapri tout moun konnen sou non Kodak Black la, fèt se paske yo akize l kòm moun ki gen kokayin, moun ki efase prèv papye arestasyon li te gen kont li, yo di tou yo arete l akoz li pa janm byen kanpe machin nan lari. Pou kounya malgre li tounen nan prizon, pa gen okenn lòt detay ki disponib pou ta konn kisa jij ki ap jere dosye li a, Barbara Duffy ap deside.
N ap soulinye, nan dat ki te 27 fevriye 2023 a, jij Barbara Duffy te mete manda dèyè Kodak Black epi li te tou mete yon òdonans deyò kote li te mansyone si tout fwa lapolis ta rive mete men sou atis Ayisyen ki gen pou nasyonalite ameriken an, li p ap gen posiblite pou l jwenn libète pou lajan menm jan sa te fèt nan mwa jiyè 2022 a.
Aprè manda sa, jou ki te 28 fevriye 2023 a, menm jij sila te pral rive kondane atis la pou l pase 30 jou yon kote pou yo te retire fenatil yo te jwenn nan san l. Men daprè sa jounal TMZ te rapòte, konsènan òdonans jij Duffy te pran an, jiskounya li posib pou rapè a ta pase tan nan prizon jouk li ta parèt douvan lajistis pou plede koze dwòg li te gen deja, puiske jounen jodi 7 desanm nan lapolis rive arete l pou menm koze a ankò.
Credit photo: Booska-P
Atik sa se pwopriyete prive ©️ Gwoup Medya MAGHAITI 2023
