PNH fè bilan arestasyon ki fèt nan dosye trafik zam ki enplike Legliz Episkopal Dayiti a an jiyè 2022. Nan yon repòtaj Lapolis Nasyonal Dayiti soti jounen jodi lendi 3 avril la, PNH la fè konnen li kontinye ap mennen ankèt sou prezime koupab nan kad dosye kagezon zam ak minisyon ilegal ki te antre sou non legliz Episkopal Dayiti nan lane 2022.
Biwo Lit Kont Trafik Estipefyan (BLTS) akonpanye ajan dwanye yo te dekouvri nan kad yon fouy plizyè kagezon nan Karibeyen Pò nan zòn lasalin nan dat 14 jiyè 2022. Tout enfòmasyon yo te fè konprann Legliz Episkopal Dayiti te itilize franchiz li pou komèt zak malonèt sa. Lapolis te rive sezi 18 fizi daso AKA 45, Galil M4, 1 fizi 12, 4 pistolè Kalib 9mm, plis pase 20 mil katouch avèk diferan kalib, 120 chajè, 1 vizè epi fo biyè ameriken ki evalye 50 mil dola ameriken.
Trafik zam ilisit, kontrebann, trafik enfliyans, fwod, evazyon fiskal, abi konfyans epi asosyasyon malfektè, se diferan chaj ki sou do legliz Episkopal Dayiti aprè zak sa selon DCPJ.
Pandanstan, Direksyon Santral Polis Jidisyè gentan arete plizyè ladan yo, tankou Gina Jean Louis Rolls nan dat 15 Jiyè 2017, pou enplikasyon li nan dosye sa. Aprè pè Frantz Cole alyas Fanfan te boude plizyè envitasyon DCPJ, lapolis te arete li nan dat 18 dawout 2022, kòm sekretè egzekitif legliz Episkopal Dayiti nan moman zak sa t ap pase a. Anplis, Lapolis ta pral arete Kontab legliz la Jean Gilles Jean Mary, nan dat 22 dawout 2022, ki te siyen plizyè dokiman sòti 2017 pou rive 2022, pou debloke lajan pou al jwenn yon Trafikan entènasyonal ki gen nasyonalite Zimbabweyen.
Vundla Sikhumbuzo, se non Zimbabweyen sa ki te toujou konn ap resevwa lajan sou kont bankè li, kote lapolis revele li jwenn pi piti 30 mil dola ameriken, men legliz Episkopal Dayiti paka jistifye objektif lajan sa ki al jwenn Trafikan entènasyonal sa.
Lapolis te mennen yon operasyon samdi 23 janvye 2023 nan kad dosye sa, BAFE te rive arete Vilmont Rubens ki te gen avi rechèch dèyè li kòm prezime sispè dosye sila. Anplis, lapolis atravè BAFE rive arete Klébert Gilles ak Djanika Gilles ki se 2 kouzen, ki se prensipal responsab pou te fè tranzaksyon pou Zimbabweyen an.
BAFE te kontinye fè konnen «Pè Frantz Cole gen plizyè kont bankè Ayiti ak lòtbò dlo, pami yo youn genyen yon gwo kantite lajan sou li epi san konte plizyè kay li genyen».
Rapò ankèt BAFE la ale pilwen pou eksplike «legliz Episkopal Dayiti gen plizyè lane depi l ap itilize koulwa enstitisyon an pou fè trafik zam antre ak fasilite» selon sa lapolis di konsènan rapò ankèt Biwo Afè Finans ak Ekonomik sou dosye legliz Episkopal Dayiti.
Prezime koupab yo itilize plizyè dwan pou fè antre komès yo, tankou ladwan Pòtoprens ak lagonav, elatriye. Sa depann destinasyon kagezon an nan peyi a.
«Anpil fwa konntenè sa yo estoke nan yon lekòl nan kapital la, sòti lajounen pou rive lannuit nan zòn kafou marasa, komin Kwadèboukè» toujou selon PNH.
Rapò BAFE a fè konnen gen yon koneksyon kèk gwoup gang ak legliz Episkopal Dayiti ki se Vilaj Dedye, Tòsèl, elatriye. Aprè arestasyon pè Franz Cole, se youn nan avoka chèf gang Vitelhomme Innocent ki te pral defann li. Mete sou sa, Lovenie Jean Louis abite nan menm zòn avèk chèf gang Vitelhomme Innocent.
«An n kontinye angaje nou, nan batay, batay kont ensekirite, batay kont bandi kòm souvan di bandi ak sapat epi bandi ak kravat. Nou pa bezwen pè depi nou mete lalwa anba bwa nou, règleman enstitisyon avèk nou, pa gen anyen k ap rive nou» deklarasyon Direktè Jeneral Lapolis Frantz Elbé.
Se 3èm rapò ankèt Biwo Afè Finans ak Ekonomik (BAFE) pwodui sou dosye legliz Episkopal Dayiti, gen 10 moun ki gentan arete epi plizyè manda lanse kont prezime koupab yo.
Atik sa se pwopriyete prive ©️ Gwoup Medya MAGHAITI 2023
