Jodi vandredi 21 avril la Òganizasyon Sitwayen pou Nouvèl Ayiti (OCNH) soti yon nòt kote li di li kondane atak nèg ak zam te fè nan zòn Kabarè, presizeman zòn Sous Matla, nan dat 18 avril 2023 a. Nan sans sa yo mande pou gen yon ankèt ki fè limyè sou dosye sa.
18 avril pase a yon gwoup nèg ak zam te debake nan Sous Matla. Menm si pa gen yon bilan ofisyèl ki soti, enfòmasyon kèk manb nan popilasyon an pataje nan mikwo Laprès fè konnen gen anpil moun ki mouri. Pami viktim yo ta genyen anviwon 8 Ti Bebe ak plizyè granmoun ki peri nan lanmè.
Jounen jodi vandredi 21 avril 2023 a, Òganizasyon Sitwayen pou Nouvèl Ayiti (OCNH) fè konnen li kondane zak sa epi mande pou ankèt tabli sou kalite aksyon sa ki fèt sou popilasyon sivil la nan Sous Matla.
«Kantite moun ki mouri plis pase 30 moun, anviwon 8 ti bebe ki nan laj 1 an mouri sou lanmè avèk fanmi yo ki t ap kouri kite lakay yo akoz gwo zak sanginè. Pandan tan sa a Lapolis kontinye fèmen zòrèy li parapò avèk masak bandi ap fè nan lokalite sa», selon sa ONCH ekri nan nòt sa.
Depi plis pase 3 jou, bandi ak zam sou chapo «Kanaran » ak gwoup «Baz 5 segonn» anvayi lokalite sous Matla, komin kabarè. Depi premye jou atak la popilasyon an pa t sispann mande Lapolis vin pote yo sekou.
«Nou lanse yon apèl an ijans avèk otorite konsène yo pou yo pran yon desizyon nesesè pou frennen masak k ap fè san koule nan sous Matla», toujou selon sa ki ekri nan nòt enstitisyon an.
Òganizasyon Sitwayen pou Nouvèl Ayiti di li denonse asasina pastè Jonas kòm notab nan lokalite a, aprè bandi te fini anvayi zòn lan. OCNH di li kontinye fikse angajman li pou Jistis ak reparasyon viktim yo.
«Nou angaje pi plis nan aksyon ak plede kont silans sou masak, nan objektif pou anpeche fèmen nan tiwa listwa».
Atik sa se pwopriyete prive ©️ Gwoup Medya MAGHAITI 2023
