Pòtoprens, jounen 7 jen 2022 an._ Aprè gwo evenman semenn pase a, kote komisè polis Miragwann lan “Jean Ernest Muscadin”, te arete epi egzekite yon prezime chèf gang ki sòti nan Vilaj Dedye ki rele “Zo Pwason”, popilasyon an divize an 2 sou dosye. Muscadin fè aksyon sa san okenn fòm pwosè, koz viktim lan pa al nan prizon, li pa pase devan yon tribinal ki gen konpetans pou sa. komisè “Muscadin” jwe 3 wòl an menm tan, li se polisye, li se jij epi li se bouwo k ap voye moun nan peyi san chapo.
Evenman sa divize peyi a an 2, majorite moun ap bat bravo paske yo estime fòk bandi yo jwenn yon repons pou jan y ap taye banda nan larepiblik, men gen yon ti minorite touzwit ki panse fòk Muscadin demisyone kòm komisè pou li ka al pase devan tribinal pou jwenn santans li akoz zak gwo ponyèt sa li komèt la.
Se nan sans sa òganizasyon k ap defann dwa moun ki rele “Fondasyon Je Klere (FJKL)”, te ekri minis jistis la pou li mande l trennen komisè a devan jij epi pou li pran gwo mezi kont li pou aksyon gwo ponyèt sa. Anplis, òganizasyon an mande reparasyon pou fanmi Zo Pwason. Men pwoblèm ki ta swadizan gen nan dosye sa, viktim lan sanble pa te twò inosan pase sa selon kèk foto ak videyo k ap sikile sou rezo sosyal yo, kote nou ka remake Zo Pwason sa ak gwo zam lagè nan men li.
Youn nan responsab FJKL ki se avoka Sammuel Madison, fè konnen komisè Muscadin gen yon gwoup nèg ki gen gwo zam nan men yo ki pa polisye. Mèt Madistin ta sanble gen chapo politisyen tou pou selon anpil moun, li ale pi lwen pou l di “pèp la pa gen pou l chwazi ant bandi ak bandi legal”, paske komisè a ap aji menm jan ak bandi yo.
Muscadin reyaji pou l di “Mèt Madistin plis sanble ak pòt pawòl bandi yo”.
Depi kèk jou ayisyen k ap itilize reso sosyal yo pran dosye sa a kè epi kanpe anfas Fondasyon Je Klere (FJKL) pou pozisyon li pran anfavè prezime bandi an. Moun yo estime bandi yo jwenn repons ki egal ak klima laperèz yo blayi sou teritwa a. Anpil nan yo mande pou lapolis tounen ak metòd zewo tolerans lan, kote depi yo pran yon bandi se ta tou mete sachè nwa nan tèt yo ak fann fwa yo. Moun yo fache, moun yo move, yo kanpe dan di fas ak demach òganizasyon an k ap mande revokasyon komisè a ak jistis epi reparasyon pou Zo Pwason.
Sa nou dwe konprann, se nòmal pou òganizasyon k ap defann dwa moun yo reyaji konsa, paske sa ensipòtab pou nan 21e syèk sa, pou yon chèf ap touye yon prezime bandi nan kondisyon sa. Ki pa reflete sosyete modenn lan. Kote tout moun gen dwa, tout moun inosan toutotan li poko pase devan yon jij pou bal santans li, domaj lajistis isit la son jistis paswa, yon jistis gòl ak men.
Nou dwe konprann tou, si nou kite yon chèf aji lib ak libè, tout lòt yo ap suiv egzanp li epi nou ka tonbe nan yon pakèt enjistis ak krim ofisyèl, kote chèf ka fizye moun jan yo vle pou dan ri. Pèsonn pa dwe gen tout pouvwa sa, lalwa dwe bousòl tout moun, menm yon kriminèl gen dwa tou, li gen dwa pou li gen yon pwosè devan yon tribinal menm jan ak tout moun epi jije ekitableman.
Sa òganizasyon k ap defann dwa moun yo dwe konprann tou, se pa sou “Zo pwason” etadedwa y ap klewonnenn an ap kòmanse. Se vre kòmisè a pa te sipoze pwononse ak egzekite santans lan, men tout prèv yo pwouve viktim lan se te youn nan moun k ap teworize popilasyon an, li te anpeche popilasyon an viv byen. Òganizasyon pa dwe chwazi tou sèlman gwo dosye pou yo fè sansasyon, se nan sans sa pèp la ap akize yo. Paske, yo preske fonksyone menm jan ak yon pati politik, selon anpil moun.
Òganizasyon k ap defann dwa moun yo dwe met pye yo atè, pou yo ka bay anpil enpòtans ak ka vyolasyon tèt chaje k ap ravaje nan peyi a, si y ap travay tout bon, se chak semenn yo ta dwe mete deyò plizyè rapò ki montre nan ki nivo enpinite a ye an Ayiti.
Kidonk, popilasyon an ta vle fè konprann se kite mò a pou n ap kriye devan sèkèy la. Nou bezwen remanbre sosyete a.
Paralèlman, se pa òganizasyon k ap defann dwa moun yo pou nou sible, se pa yo pou n ap kalonnen. Batay la dwe konsantre sou koripsyon, ensekirite, lavi chè, kidnapin, elatriye.
Nou dwe konsantre n kòman n ka wete peyi a nan men bandi epi ak kanpe yon pwojè byennèt pou tout moun.
© Tous droits réservés – Groupe Média MAGHAITI 2022
