Menm jan yo te tante fè l plizyè fwa pandan ane 2023 a, endividi ak zam atake plizyè zòn tankou Solino, Dèlma 24 ak Nazon nan lannuit mèkredi premye me 2024 la. An konsekans, selon divès videyo ki pataje sou rezo sosyo yo plizyè dizèn moun te blije kouri kite zòn sa yo yon fason pou pa t viktim.
Se yon atak ki te kòmanse nan 9è nan lannuit premye me a, kote bal pa t sispann chante espesyalman nan Solino ak Dèlma 24. Pandantan sa, abitan nan zòn sa yo pa t sispann lanse SOS pou Lapolis la, puiske laperèz kontinye anvayi popilasyon an.
Pou kounya, pa gen okenn bilan sou moun ki ta pèdi lavi yo nan atak sila, men n ap fè konnen tou divès lòt zòn tou pre ayopò Toussaint Louverture a sitiyasyon an pa t diferan rive jous maten jedi 2 me 2024 la. Yon lòt kote, gwoup rezistans nan Solino a fè tout moun konnen toutotan yo la, y ap toujou kanpe goumen pou zòn yo, kidonk pyès bandi pap ka fè yo kouri.
N ap soulinye 25 avril pase a, zòn nou site yo bandi ak zam te rive sakaje plizyè kote ladan yo, aprè enstalasyon Konsèy Prezidansyèl Tranzisyon an nan Palè Nasyonal ak nan Laprimati. Anpil moun te sòti blese, nèg ak zam yo te pwofite boule kay moun yo tou sitou nan Dèlma 24.
Atik sa se pwopriyete prive © Gwoup Medya MAGHAITI 2024
