12 jou aprè tout aktivite nan Tèminal Vare a te kanpe akòz nèg ak zam te bloke wout yo, Lapolis li menm rive reprann kontwòl wout ki mennen nan sant estokaj gaz la. Selon Le Nouvelliste, depi ayè mèkredi premye me a Polis Nasyonal Ayiti a (PNH) mete dispozitif li douvan Tèminal la.
“Plizyè blende lapolis la devan Tèminal la. Yo fè pasaj la epi yo ta dwe rete nan menm pozisyon sa a”, daprè pawòl jounal ki sot fete 126 lane egzistans li an rapòte. Yon lòtbò, yo fè konnen aktivite distribisyon gaz yo vize fèt jodi jedi 2 me 2024 la, puiske gen 200 000 baril pwodui petrolye ki sou dlo epi ki ta dwe rive jodi a menm nan 10è nan maten.
Pandantan sa, toujou gen dout sou livrezon gaz la malgre prezans lapolis, epi menmsi pa te gen afwontman ant fòs lòd yo ak bandi ak zam nan jou pase yo. Jiskaprezan, responsab yo nan lapolis la, ak tout moun k ap jere kominikasyon pou Tèminal Vare a poko di anyen sou dosye sa.
Dayè, dènye detay sou gaz ki te sòti nan pi gwo sant estokaj gaz peyi a te fèt nan dat ki te 18 avril 2024 la, sou kont X yo a. kote yo te fè kwè, nan sant estokaj WINECO a te gen 158,950 galon dyezèl, ak 354,850 galon gazolin, sa ki bay 61 kamyon sitèn ki te sòti nan espas la.
Atik sa se pwopriyete prive © Gwoup Medya MAGHAITI 2024
