Nan yon nòt pati Fanmi Lavalas la rann piblik jodi mèkredi premye me 2024 la, yo konsidere sa ki te fèt ayè nan konsèy prezidansyèl la kòm yon maskarad ak Konplo pou garanti PHTK ak alye l yo pou kenbe pouvwa tranzisyon an. Selon yo menm sa fèt se nan lide pou kontinye tradisyon koripsyon an.
« Pèp la bouke soufri pandan bandi legal ak alye l yo ap pwofite sou do l», se sa ki ekri nan nòt Fanmi Lavalas la.
Paralèman nan menm nòt sila, fanmi Lavalas pwofite salye achitèk li, Leslie Voltaire pou kouraj li ak dèske li bay tout li menm. Mete sou sa yo soulinye tolerans epi jefò li fè pou rasanbleman, pou jwenn yon vrè konsansis anfavè reyisit tranzisyon sa epi retire popilasyon an nan malsite l ap viv la.
« Òganizasyon politik Fanmi Lavalas salye kouraj popilasyon an k ap viv yon lanfè sou tè zansèt li yo. Yon tranzisyon ki vire do bay bandi legal ki fin depafini ak peyi a nan piye resous leta, ta ka bay pèp la yon ti kras lespwa.», daprè sa yo ajoute pou denonse chwa prezidan Konsèy la ak premye minis ki te fèt ayè madi 30 avril 2024 la.
Sou yon lòtbò, menm janm avèk fanmi Lavalas ak Biwo Suivi Akò Montana, ansyen senatè Youri Latortue fè konnen chwa premye minis, Fritz Belizaire, fèt nan vyolasyon prensip majorite a ki te tabli nan akò 3 avril 2024 la. Selon konsta l, li fè kwè volonte kèk dirijan politik se pou pran pouvwa a pandan peryòd tranzisyon an nan lide pou favorize pati yo nan pwochen eleksyon yo.
« Konpwomi Istorik mande majorite a pou yo rale kò yo nan desizyon sa», se sa ansyen senatè Youri Latortue deklare. Li menm mande pou tout lòt pati konsène yo pou yo depoze pyès yo pou chwa premye minis la nan kad pwosesis kandidati yo.
Pou fini, fanmi Lavalas voye jete ak tout fòs li seremoni 30 avril 2024 la, puiske yo estime se yon trayizon ki fèt nan jounen sa. Paske yo mansyone yo menm yo rete makonnen avèk revandikasyon pèp la pou yon lòt leta.
Atik sa se pwopriyete prive © Gwoup Medya MAGHAITI 2024
