Nesmy Manigat ki se Minis Edikasyon Nasyonal ak Fòmasyon Pwofesyonèl la(MENFP), atravè yon twit jounen dimanch 12 mas 2023 a, fè konnen gen gwo posibilite pou ane eskolè a pa sove jan sa te dwe fèt nòmalman.
«Se pa yon ane nou ka sove, men se yon jenerasyon ki pèdi pou pi piti yon ane eskolè nan 4 an. Omwen 190 jou lekòl pase nan gagòt, akoz sitiyasyon aktyèl peyi ap konnen yo. Yon pousantaj 70% elèv te pèdi 60 jou lekòl, pandan mouvman peyi lòk 2019 la. Nan lane 2020, pasaj kowona viris la (COVID19), te lakoz 97% elèv te blije rate 70 jounen lekòl», selon sa minis edikasyon an ekri.
Pou minis lan, malgre tout jefò «Soti oktòb pou rive desanm 2022, 90% elèv ta pral pèdi 60 jou lekòl akoz kriz sosyal ak politik nan peyi a».
Alòske pandan ane akademik 2022- 2023 a, plizyè timoun deja rate plizyè jou lekòl akòz reyalite afwontman gwoup gang nan plizyè lokalite nan peyi an, anplis zak kidnapin ki pa sispann taye banda li. Sa ki lakoz anpil laperèz nan mitan enstitisyon k ap ofri edikasyon timoun yo ak anplwaye k ap bay sèvis ladan yo.
Nan dènyè semèn lan, minis lan te chita avèk enstitisyon lapolis la pou li mande prezans yo devan lekòl yo, pou lekòl la ka relouvri demen Lendi 13 mas la anndan peyi an. Poutan, gen kèk lekòl ki te gentan fèmen pòtay yo pou reprann pwosesis pou elèv yo ta suiv kou anliy, pandanstan gen plizyè jou pa gen kouran nan kèk zonn lan peyi an.
Atik sa se pwopriyete prive ©️ Gwoup Medya MAGHAITI 2023
Discussion about this post