Nan yon seremoni ki fèt nan kad semèn Amerik Latin ak Karayib la (SALC) jodi jedi 30 me 2024 la nan kapital Lafrans lan, fanmi Mikaben resevwa pri “Médaille du Sénat” a pou atis la. Se Prezidan Sena Lafrans la, Gérard Larcher, ki te bay pri a aprè anbasad Ayiti sou tè fransè a te chwazi pwopoze non atis la ki te mouri 15 oktòb 2022 nan menm peyi sa a.
“Dekorasyon Sena a se yon omaj pou kontribisyon Mikaben ki te fè valè kilti ayisyèn nan sou sèn mizikal entènasyonal la, e tou se yon rekonesans pou enpak mesaj li fè an Ayiti“, daprè sa a anbasad Ayiti a eksplike nan yon nòt yo ekri nan sikonstans la. Nan kominike sa a, anbasad la montre menm aprè lanmò atis la eritaj li ap toujou rete vivan nan zèv li epi nan lanmou l te genyen pou peyi l.
Malgre prim nan se paran l ak frè l ki resevwa l, anbasad la soulinye se yon fason pou yo onore memwa Michael Benjamin moun konnen sou non Mikaben, men tou se pou yo kapab eksprime lapèn yo pou fanmi an espesyalman madanm li, Vanessa Benjamin, pitit li yo, Gabriel, Leia, ak Maïa, sè li, Mélodie Benjamin epi tout fanatik ki te touche ak lanmò trajik sa a.
N ap fè konnen, evènman sa a se moman Lafrans chwazi pou onore rejyon an epi selebre tout richès li gen ladan l. Pou 13èm lane egzistans “Médaille du Sénat” a, anbasadè Ayiti nan peyi sa a, Jean Josué Dahomey Pierre, ak plizyè diplomat nan Amerik Latin nan ak nan Karayib la epi kèk gwo pèsonalite fransè te la.
Mikaben se otè plizyè album tankou Vwayaj ki te sòti nan lane 2000, Mika nan lane 2004, MKBN nan lane 2018. Mete sou kote pwojè pèsonèl li, atis Ayisyen an ki te mouri ak 41 lane te kolabore ak divès gwoup e anpil lòt atis nan monn mizik la.
Atik sa se pwopriyete prive ©️ Gwoup Medya MAGHAITI 2024
