Ayè lendi 31 oktòb 2022 a, lidè Pati Pitit Desalin lan Moïse Jean Charles te prezante popilasyon nan Nò a Konsèy Tranzisyon Pèp Souvren (KTPS), ki pral gen pou misyon chita ak divès aktè politik epi elit peyi a.
Yon konsèy sa genyen 9 manm, ki pral chaje misyon pou li wè kòman li ka diskite ansanm ak plizyè lòt moun pou yon pwopozisyon sòti kriz.
Ansyen palmantè a Moïse Jean Charles, te tou pwofite pale sou sak rive jounalis ak Lanmò antreprenè epi politisyen Éric Jean Baptiste : « Se pou sa n te fè manifestasyon nan peyi a, nou te gentan wè sak t ap vini. Si n pa te wè danje poukisa n t ap di pèp la leve kanpe», deklarasyon lidè pati an.
Evenman sa te transfòme an veritab manifestasyon, kote yon dividal moun te pran lari nan dezyèm vil nan peyi a ki se Okap. «Jodia nou pran yon lòt wout, nou mete yon konsèy anplas pou n montre lemonn antye se pa yon bagay pèsonèl, men se bagay pèp Ayisyen an», pawòl Moïse Jean Charles.
Pandan, foul la t ap lanse pawòl piman bouk kont chèf primati an, Ariel Henry, lidè Pati Pitit Desalin lan te tou pwofite ajoute sa: «Aprè nou pral pouse Ariel nan tèt peyi a pou n kapab enpoze konsèy sa epi pou l pale avèk tout moun nan peyi a, pou li bay sekirite epi fè eleksyon pou n fini avèk sitiyasyon jodia.»
Revandikasyon kont pouvwa anplas pou move jesyon li nan tèt peyi p ap kanpe jiskake li ale.”Mobilizasyon sa p ap kanpe jiskake Ariel sòti kite pouvwa epi nou enstale konsèy moun nan Nò patisipe jodia“, selon Moïse Jean-Charles.
Lidè Pati Pitit Desalin lan, rete kwè sèl mwayen pou n sòti nan sa nou ye a se enstale KTPS nan peyi a, lè sa tout bagay ap rantre nan lòd li.
Atik sa se pwopriyete prive ©️ Gwoup Medya MAGHAITI 2022
