Nan yon reyinyon ki te tanmen jodi jedi 12 oktòb 2023 a, ant peyi ki nan Òganizasyon Eta Ameriken yo sou pwoblèm ki gen ant Ayiti ak Repiblik Dominiken, reprezantan Ayiti a, Léon Charles, fè konnen konstriksyon kanal la pap kanpe. Konsa, li fè konprann menm jan Repiblik Dominiken te konstui 12 kanal san l pa t mete Ayiti okouran an, sa paka ba yo pwoblèm dèske Ayiti ap fè pa l la san otorizasyon yo tou.
“Repiblik Dominiken dwe konnen menm jan li gen dwa pou eksplwate dlo rivyè masak la, nou menm tou nou gen dwa sa tou. Konstriksyon kanal la pap kanpe”, se sa ansyen direktè jeneral lapolis la deklare nan reyinyon sila kote minis zafè etranjè dominiken an, Roberto Alvarez, te la tou pou defann pozisyon peyi l la.
Menm jan ak tout lòt reprezantan dominiken ki toujou ap pale sou koze kanal la, minis Alvarez nan bò pa li, toujou kenbe menm diskou a kote l di konstriksyon kanal la reprezante gwo danje pou peyi l. Mete sou sa, li kontinye pou l di youn nan bagay ki fè yo trouve kanal la ilegal epi vyole trete zanmitay 1929 la, se paske gouvènman ayisyen an pat di yo sa avan.
Yon diskou selon diplomat ayisyen an, Léon Charles ki kontrè pa rapò ak pwòp konpòtman gouvènman dominiken an te afiche, puiske yo menm jouskaprezan yo rive konstui 12 kanal san yo pa t menm vinn mande Peyi Dayiti otorizasyon l jan y ap mande pou nou ta fè a.
Yon lòt kote, sekretè jeneral OEA a, Luis Almagro di li prè pou l voye prese prese yon misyon vinn vizite kanal la, men selon prezisyon l moun sa yo ap gen pou fè yon rapò sou kesyon teknik resous dlo a ak kesyon jiridik yo. Nan menm sans sa toujou pou fasilite dyalòg, li pwopoze pou fè yon reyinyon pou gouvènman Ayiti a ak dominiken an yon fason pou yo antann yo epi pou ka jwenn yon akò.
Toujou nan kad pou eksplwate resous dlo nan peyi Dayiti, minis ekonomi ak finans la, Michel Patrick Boisvert te deklare lendi 9 oktòb pase a, sou panèl Magik9 gen lajan nan bidjè 2023-2024 ki disponib menm pou kesyon irigasyon nan zòn Nò a.
“Nan bò pa gouvènman an, refleksyon nou yo ale pi lwen pase konstriksyon yon grenn kanal. Li enpòtan tou, men gouvènman an ap panse pou tout rejyon Nò a, n ap mete aksan espesyalman sou plèn Maribawou. Gen anviwon 5 milyon dola disponib ak posiblite pou l ogmante rive nan 15 milyon“.
Atik sa se pwopriyete prive ©️ Gwoup Medya MAGHAITI 2023
