Aprè yon gwo tribinal nan Kenya te deside entèdi pou yon ti tan misyon polisye kenyan yo an Ayiti 9 oktòb pase a, jodi vandredi 13 oktòb 2023 a, kabinè ministeryèl peyi a deside bay otorizasyon l pou polisye sa yo ka vinn mennen misyon sa tout bon vre an Ayiti, selon Nation Africa.
Se vre kabinè ministeryèl la mete l dakò pou deplwaman polisye sa yo nan peyi a, men Minis enteryè a, Kithure Kindiki deklare pou l di malgre kabinè a pran desizyon sa, responsab yo paka voye okenn sòlda vinn Ayiti toutotan palman an pa ratifye sa.
Pou kounya, enspektè lapolis kenyan an, Japhet Koome, fè konnen yo toujou nan faz pou rasanble sòlda. Konsa, minis Kindiki fè manb opozisyon kenyan an konnen misyon sa pap mete lavi okenn polisye an danje, ni al lage yo yon kote pou yo paka viv byen.
“Evalyasyon ekip ki te vinn Ayiti a montre klè n ap asire e misyon an ap gen siksè“, daprè deklarasyon minis la.
N ap raple Kenya ap gen pou voye sèlman 1 000 ajan polis nan peyi a, lòt ajan yo se lòt peyi k ap gen pou bay yo. Nan kesyon finansman fòs la, responsab yo te tanmen konvenk popilasyon yo a kote yo di se yon misyon entènasyonal kidonk okenn depans pa p fèt sou kont lajan gouvènman yo a, men lajan sa yo se pito Òganizasyon Nasyonzini k ap bay li, sitou Etazini ki te deja pwomèt 200 milyon dola vèt pou misyon sila ki ta dwe dire yon lane.
Crédit photo: Le Quotidien 509
Atik sa se pwopriyete prive ©️ Gwoup Medya MAGHAITI 2023