Nan yon nòt ki sòti jodi lendi 6 me 2024 la, responsab yo nan lapolis la anonse y ap chache arete tout prizonye ki te sove kite prizon nan mwa mas ak avril la. Se pou sa a, yo mande pou popilasyon an pa kenbe okenn prizonye nan zòn yo san yo pa denonse yo, puiske yo fè konprann endividi sa yo reprezante gwo danje pou sosyete a.
«Kòmandan an Chèf PNH la pase plizyè inite ak direksyon depatemental nan Polis la lòd fòmel pou trake epi remete nan plas yo tout endividi ki ta sove nan plizyè prizon tankou Penitansye Nasyonal, Prizon Kwadèboukè, Kabarè, Pòdepè nan moman envazyon yo», daprè sa yo ekri.
Yon lòt kote, responsab yo soulinye desizyon sa a pran se aprè reyinyon ki te genyen dimanch 5 me a, kote yo te diskite sou kijan yo kapab mete plis sekirite nan sant kaseral yo.
Se pou sa a, depi kounye a menm responsab lapolis yo fè tout moun konnen yo lanse gwo operasyon pou kenbe tout prizonye sa yo, kèlkeswa kote yo ta twouve yo a. Men tou, pou kapab reyisi nan aksyon sa a, yo mande kolaborasyon popilasyon an puiske yo di: «zafè sekirite a se zafè tout sitwayen konsekan, se sèl nan yon kolaborasyon Polis ak popilasyon n ap rive konbat tout zak banditis nan peyi a».
Pou kounye a la, PNH la bay yon lis 98 prizonye ki te sove kite Penitansye, prizon Kwadèboukè a ak prizon sivil Pòdepè a. N ap soulinye nan lis sa a, Ezéchiel Alexandre alyas Ze ak tout Albert Steevenson alyas Djouma se 2 manm gang danje lapolis la di l ap chache tou. Pandan tan sa a, pa twò lontan « Ze» repran kontwòl Kafoufèy aprè l te fin chape poul li nan Penitansye.
N ap fè konnen, 3 mwa aprè 2 pi gwo prizon peyi a te kraze poko janm gen yon bilan ofisyèl ki bay pou di men konbyen prizonye ki deyò. Poutan, selon estimasyon Biwo Entegre Nasyonzini an Ayiti (BINUH) gen plis pase 4 600 prizonye ki te chape poul yo nan lannuit 2 mas la, mete sou sa a komisè gouvènman Pòdepè a, Jéir Pierre, fè konnen gen 8 lòt prizonye ki sove nan prizon Pòdepè a vandredi 2 me 2024 la.
Atik sa se pwopriyete prive © Gwoup Medya MAGHAITI 2024