José Raúl Mulino genyen eleksyon prezidansyèl nan peyi Panama yè dimanch 6 me 2024 la anfas Ricardo Lombana, sou yon lòt total 34.4% vòt kont 25% vòt parapò advèsè li a, selon France 24.
Kandida konsèvatè Raúl Mulino, ki gen 64 an rive genyen eleksyon an anfas ansyen anbasadè Ricardo Lombana gras ak 9 pwen diferans.
«Se yon gran plezi pou mwen nan non tribinal elektoral la pou m enfòme w, ou genyen eleksyon prezidansyèl nan Repiblik Panama», sa a se deklarasyon Alfredo Junca, aprè li te fin rele José Raúl Mulino pou l fè l konnen li genyen eleksyon an. Nouvo prezidan an te répond devan patizan l yo pou li di : «M gen responsabilite ak imilite. Mwen pa mayonèt pèsonn.»
José Raúl Mulino se te ansyen minis sekirite sou pouvwa Ricardo Martinelli, aprè l vin minis afè etranje epi minis lajistis. Ant 2015 ak 2016 nan peyi Panama, Raúl Mulino ta pral jwenn arestasyon l pou yon tan tou kout pandan akoz akizasyon koripsyon ki te peze sou do l.
Eleksyon sa a gen anviwon 3000000 panameyen ki te vote epi penmèt yo renouvle 71 depite nan palman an (Yon sèl chanm).
Paralèman, kandida ki pèdi an te rekonèt li pèdi eleksyon an epi lanse kèk pinga bay nouvo prezidan an José Raúl Mulino.
«M ap lonje men m ba w si w ap fè sa ki byen, si w ap fè sa ki mal w ap wè moun yo nan lari ap manifeste. Si w rekòmanse fè sa n te konn fè pandan plizyè ane yo, ou pran distans avèk vwa pèp la e si w oze negosye ankò kontra min avèk peyi Kanada, si w privatize edikasyon an, si w kontinye fè presyon sou moun yo kòm otorite. Ou pral jwenn pèp la nan lari a.», se sa a Lombana deklare, li te tou pwofite salye tout patizan l yo.
N ap raple peyi Panama ap fè fas ak yon kriz ekonomik tèt chaje, kote kwasans ekonomik li chite ant 7.3% an 2023 e ki pase ak 2.3% an 2024, selon Fon Monetè Entènasyonal (FMI). Enstitisyon sa fè konnen gen plizyè moun ki pèdi travay yo.
Atik sa se pwopriyete prive © Gwoup Medya MAGHAITI 2024
