Daprè jounalis Fred Kelitho Banath, Frantzen Charles ak Tayson Latigue ta disparèt nan zonn Site Solèy aprè kout bal bandi G9 ak G-pep t ap pete. Aksyon sa a pase nan kad yon entèvyou 7 jounalis t al reyalize ayè dimanch 11 Septanm 2022 a, nan komin Site solèy avèk paran Christela Delva ki te pran yon bal nan tèt Samdi 10 Septanm ki sot pase la.
Fred Kelitho Banath se youn nan temwen ki fè pati 5 jounalis sa yo ki te rive chape anba bal bandi nan Site Solèy. Daprè sa li temwanye nan yon entèvyou li bay sou Radyo Mega lendi 12 Septanm 22 a, li pa konfime lanmò Charles ki se kolaboratè Kesnel Dorléan epi (FN news)ak Latigue ki ap travay pou (Ti jèn jounalis), akoz “li pa wè ni foto ni videyo baz G9 la lage, jan sa toujou fèt lè yo fè mò”.
Kelitho nan kontak li tabli ak responsab baz G9 ki okipe bò lopital Medsen San Fontyè a di “nèg yo afime yo pa fè mò nan kan pa yo a. Osnon yo t ap wè foto ak videyo jounalis yo jan sa konn fèt pou baz G9 la lè yo fè mò“, daprè pawòl Fred Kelitho Banath.
Nan objektif pou fè vwa paran Christela Delva rive nan zòrèy otorite responsab yo, 7 jounalis pami yo Frantzen Charles, Tayson Latigue, ak Fred Kelitho Banath te al reyalize yon entèvyou ak paran elèv 17 lane sa a ki ta pral fè filo ki te mouri Samdi 10 Septanm 2022 a, pandan li te avek manman l nan yon kamyonèt.
Nan eksplikasyon Banath t ap bay sou Radyo Mega, li presize pa te gen bal ki t ap tire avan yo te jwenn pasaj G-pep pou antre kote paran elèv la rete a. Li presize se pandan y ap retounen yon bal G-pep nan tantativ pou pran machin yon granmoun, baz G9 te pran li pou yon atak ki ta pral louvri bal kèk tan aprè nan zonn lan.
Banath nan tantativ pou konnen a klè sa k rive Frantzen Charles ak Tayson Latigue te mande 2 jounalis ki te avèk yo pou chache gen kontwòl nèg yo, pandan yo menm yo te anba raje a akoz tire ki te vin genyen. Li afime li rele viktim yo plizyè fwa, telefonn yo sonnen san repons.
Nan preyokipasyon 5 jounalis ki chape anba bal yo, yo te tanmen plizyè tantativ pou yo te konnen èske pa te gen moun ki wè Jenn jounalis yo ak moto yo te sou li yo?
“Pèsonn pa te wè kò yo ni moto yo, sof tras san yo te remake pandan y ap antre nan zonn lan, menm lopital Medsen San Fontyè zonn lan di li pa te resevwa blese’‘ toujou selon deklarasyon Banath.
Fred Kelitho Banath anonse li ap retounen nan zonn Site Solèy pou li al chèche kò Charles ak Latigue si tout fwa yo ta mouri vre. Banath mande ak tout jounalis ki ta vle ede tanmen pwosesis la, pou antre an kontak avèk li.
Atik sa se pwopriyete prive ©️ Gwoup Medya MAGHAITI 2022
World
Discussion about this post