Kèk tan aprè zak asasinay ki fèt sou 3 polisye inite anti gang (UTAG) yo nan zòn Dèlma 18, Konsèy prezidansyèl tranzisyon an eskprime endinyasyon li fas ak sitiyasyon sa.
Nan yon nòt biwo Laprezidans lan rann piblik, KTP pwofite pou l voye l senpati l bay fanmi viktim yo ansanm ak zanmi yo anndan enstitisyon an. Nan sans sa, Konsèy prezidansyèl la di li renouvle detèminasyon l pou l travay yon fason pou kapab rann kapasite operasyonèl fòs piblik ayisyen an pi fò yon manyè pou rive trake bandi epi mete yon klima lapè ak sekirite nan peyi a.
KPT a pa sèl enstans ki denonse lanmò 3 polisye sa yo, menm jan ak Konsèy la Ofis pwoteksyon sitwayen (OPC) di li endinye fas ak asasina ajan polis yo.
OPC reyaji nan yon nòt li mete deyò kèk moman aprè aksyon sa fin poze kote l reklame chanjman nan tèt Polis nasyonal dAyiti a aprè dram sa li kwè ki revòltan.
Ofis pwoteksyon sitwayen an ki gen nan tèt li, Renand Hédouville mande polisye ki sòti nan tout inite yo pou yo fè solidarite youn lak òt pou kapab rive konbat asasina pa pil k ap fèt sou ajan yo nan Lapolis la.
Pi lwen OPC mande ak otorite konsène pou yo pran bon jan mezi pou evite dram sa yo sispann repete nan enstitisyon an.
Nan kad anbiskad sa ki pote ale lavi 3 ajan fòs lòd yo ayè dimanch 9 jen 2024 la, genyen yon machin blennde ki pase anba flanm dife epi yon lòt polisye sòti blese k ap pran swen lopital.
Atik sa se pwopriyete prive ©️ Gwoup Medya MAGHAITI 2024
