Kèk jou aprè Kenia Civil, etidyan nan 4yèm ane syans enfimyè te rann dènye souf li nan lopital Laplas akòz swen li pa t rive jwenn, komisè gouvènman Okay la, Ronald Richemond, deside fèmen lopital la
jodi jedi premye jen an. Dezisyon sa pran akòz responsab lopital la pa reponn ak envitasyon yo te fè yo nan pakè vil la.
An prezans Jij pou lapè, fanmi viktim nan, avoka ak divès lòt moun nan popilasyon an, chèf pakè vil Okay la, Ronald Richemond fèmen lopital Laplas la kote yo entèdi moun manyen oubyen antre nan lopital la. Desizyon sa pran, kèk tan aprè responsab lopital la pa reponn ak 2 envitasyon komisè a te fè yo, kote yo rive nan pozisyon pou derefize kolabore ak lajistis akòz yo pa vle pataje videyo ki te anrejistre pandan jou sa.
“Pa manyen ni chanje anyen“, se sa ki ekri sou pòt lopital la ki fèmen nan moman n ap pale la. Nan menm sans sa, avoka fanmi Kenia montre l pa dakò ditou ak kesyon fèmen lopital la, e li deklare aksyon sila pa vle di anyen nan sa k gen pou wè ak lalwa paske l di “se tan komisè a vle bay responsab lopital yo pou efase tout prèv yo”.
Kontrèman ak fanmi viktim nan ki fè konnen se pou 4 000 mil goud yo te manke ki fè lopital la te kite Kenia Civil mouri nan dat ki te lendi 22 me 2023 a, responsab lopital la yo menm te demanti nan yon kominike yo te fè sòti 28 me a, enfòmasyon ki di yo te refize bay pasyan an laswenyay pou lajan an.
“Direksyon an demanti enfòmasyon k ap di nou te refize bay pasyan an swen pou lajan an“, se sa yo te ekri nan kominike sa a.
Yon lòt bò, nan eksplikasyon yo te bay yo, yo fè kwè etidyan nan enfimyè a te rive lopital la ak siy ki te montre pa t gen lavi pou li ankò. Yo menm rive di, aprè transfè Kenia sòti nan lopital prive Citymed la(kote selon yo, li te entène deja), estaf medikal yo a te fè 10 minit pou tante reyanime l, malgre sa li te rive mouri kanmenm.
Pou kounya, doktè ki responsab lopital la ak tout madanm li gen entèdiksyon pou kite teritwa a. Konsa tou, yo gen manda dèyè yo yon fason pou lapolis kapab mennen yo douvan lajistis, selon sa komisè Okay la deklare nan mikwo laprès.
Crédit Photo: Le Nouvelliste
Atik sa se pwopriyete prive ©️ Gwoup Medya MAGHAITI 2023
